"Abşeron -- A1" sakinlərə göstərdiyi yüksək xidmətə görə, ölkənin seçilən tikinti şirkətlərindən birinə çevrilib -- RƏY   

WhatsApp Image 2021 04 18 at 23.23.13

Şirkətin tikdiyi yaşayış kompleksindən ev alan 500 nəfər arasında narazı kimsə tapılmadı

Araşdırmalarımız da sübut edir ki, bu MTK-nın rəhbər şəxslərinə qarşı irəli sürülən iddia və ittihamların heç bir hüquqi əsası yoxdur, bunlar aşkar yalanlardır  

Son illər, ölkə ərazisində fəaliyyət göstərən bir çox Mənzil -- Tikinti Kooperativlərinin ürəkbulandırıcı xoşagəlməz fəaliyyətləri ilə bağlı ağlagəlməz saxtakarlıqlar dolu dələduzluq faktları ortaya çıxıb. Elə olub ki, həmin şirkətlərin səlahiyyət sahibləri və vəzifəli şəxsləri tikdirdikləri həmin evlərdəki bir mənzili dörd-beş adamın adına satmaqdan belə çəkinməyiblər. Danılmaz faktdır ki, aldanan belə vətəndaşlar artıq nə edəcəklərini bilmirlər. Çünki şikayət etmədikləri aidiyyatı dövlət qurumu qalmayıb. Üz tutduqları bütün ünvanlardan "əlləri ətəklərindən geri dönüblər".
Xeyli müddətdir ki, ölkə mətbuatı və sosial media ilə bərabər, "Araz" Media Qrupundakı mətbu vasitələrin, daha çox isə, araz.az xəbər portalının da gündəmi zəbt edən əsas mövzularından biri, heç şübhəsiz, respublika ərazisində fəaliyyət göstərən və illərdən bəri mövcud olan problemlərini həll edə bilməyən bir çox tikinti şirkətlərində baş verən xoşagəlməzliklərlə bağlı olur. Kütləvi informasiya orqanlarının, vətəndaşların şikayət xarakterli müraciətləri əsasında dərc olunmuş həmin məqalələrində o da qeyd olunur ki, əhali, bütün bunlara görə, hətta, son ümid yeri olaraq, Prezident Administrasiyasına belə üz tutub, ünvanına saysız-hesabsız şikayətlər göndərir. Sakinlərin şikayətlərində, əsasən, 100-dən çox tikinti qurumu tərəfindən çoxmərtəbəli yaşayış binalarının inşası zamanı mövcud qanunlarımızın tələblərinə əməl olunmaması, müvafiq norma və qaydalara, həmçinin müqavilə şərtlərinə riayət edilməməsi, bəzi şirkətlərin mənzilləri iki və daha artıq şəxsə satması, razılığa gəlinmədən və kompensasiyalar verilmədən vətəndaş mülklərinə qanunsuz müdaxilələrlə və varvarcasına hücumlarla söküntü işlərinə başlanılması, binaların təhlükə törədəcək dərəcədə yaxın məsafələrdə tikilməsi xüsusi vurğulanır. Qeyd olunur ki, edilən şikayətlərə baxmayaraq, mərkəzi və yerli icra hakimiyyəti orqanlarında, eləcə də əlaqədar digər qurumlarda vətəndaşların müraciətlərinə, xüsusilə haray-həşir dolu şikayət ərizələrinə diqqət yetirilmədiyi üçün, edilən şikayətlərin sayı azalmaq əvəzinə, getdikcə daha da çoxalır.
Doğrusu, araz.az-ın dərc etdiyi bu dəfəki yazı da, oxşar mövzular silsiləsindəndir və bir şikayətçi vətəndaşın ittiham və iddialarına rəğmən qələmə alınıb. Di gəl ki, əməkdaşlarımızın, digər media qurumlarından olan bir qrup həmkarları ilə birgə, bu məsələyə aydınlıq gətirmək üçün apardıqları jurnalist araşdırmalarından sonra, həmin vətəndaşın şikayətlərinə heç cür haqq qazandırmaq olmur. Çünki onun ortada olan ittiham və iddiaları təəssüf doğuran aşkar böhtan və yalanlar üzərində qurulub. Şikayətçi unudur ki, ölkədə müştərilərinin etibar və inamlarını qazanan tikinti şirkətləri də var və onların barəsində mətbuata yalan materiallar ötürmək vicdan çərçivəsinə sığmır.
Həmin şəxsin ünvanına yalan hədyanlar söylədiyi həmin tikinti şirkəti, yarandığı vaxtdan indiyədək, sağlam təməlli və müasir görünüşlü binaların inşası ilə daim alıcıların diqqət mərkəzində olan "Abşeron -- A1" Mənzil -- Tikinti Kooperatividir. Araşdırmalarımızdan məlum olur ki, həmişə öz hərəkətverici qüvvəsiylə, layihələri üzrə öhdəsinə götürdüyü işləri müvəffəqiyyətlə yerinə yetirərək, məsuliyyət daşıdığı işləri vaxtında və yüksək keyfiyyətlə təhvil verir. Hər bir yeni layihədə bu şirkət, sahib olduğu potensialını daha da artıraraq, öz müştərilərinin hörmətini və etibarını qazanır. Həyata keçirdiyi bircə layihəyə diqqət etmək kifayətdir ki, onun gücü və peşəkarlığı haqqında insanda təəssürat yaransın. Konkret desək, "Abşeron -- A1" MTK peşəkar fəaliyyətini dəfələrlə sübut etməklə, sakinlərin etibar və hörmətini təsadüfən qazanmadığını əyani şəkildə göstərib. Bir sözlə, alıcıların rahatlığını təmin edəcək yaşayış evləri ilə, bazarda keyfiyyət və rahatlığın ünvanına çevrilib. Elə, insanların komfortunu və rahatlığını düşünməklə də, inşaat sektorunda inamlı addımlarla irəliləməkdədir.
Araşdırmalarımızdan o da məlum olur ki, bu gün sərfəli qiymət və şərtlərlə alıcılarına yaşayış komplekslərindəki yeni tikililərdə mənzillər təklif edən şirkətlərdən biri də, elə, "Abşeron -- A1"-dir. Fəaliyyət göstərdiyi illər ərzində öz etibarlılığı ilə seçilən bu MTK-nın, inşa etdiyi yaşayış evlərindən mənzil almaq üçün, çox sərfəli qiymətlərlə alış şərtləri irəli sürülür. Bu evlərin daha bir üstünlüyü ondan ibarətdir ki, 24 saat mühafizə olunur və yerləşdikləri kompleksin ərazisində yüksək zövqlə abadlaşdırma işləri aparılır, üstəlik, sakinlərin rahatlığı üçün hər şey nəzərə alınır. Mənzillərin sahəsində hər hansı problemdən söhbət gedə bilməz. Keyfiyyətli tikinti materialları vasitəsi ilə, yüksək zövqlə inşa edilən bu yaşayış binaları daimi işıq, qaz və su ilə təchiz edilir. Binalarda modern yük və sərnişin liftləri, habelə yeraltı avtodayanacaqlar nəzərdə tutulur.
Araşdırmalardan sonra gəlinən son qənaət belədir ki, bütün bu böhtan və yalanlar, yaradıldığı gündən şəffaflığı və sakinlərə göstərdiyi yüksək xidmətə görə, seçilən tikinti şirkətlərdən birinə çevrilən "Abşeron -- A1"-in işinə kölgə salmaqdan başqa bir şey deyil. Elə, araşdırmalar nəticəsində, bu yöndən üzə çıxarılan bəzi mühüm detallar da bunun inkarolunmaz təsdiqidir. Belə ki, xeyli bundan əvvəl, “Abşeron-A1” MTK-da sədr vəzifəsini Ağamoğlan Duman oğlu Ağayev müvəqqəti icra edərkən, onun, indi şikayətçi olan həmin vətəndaşla -- Bakı şəhəri, Nərimanov rayonu, R. Axundov küçəsi, ev, 43, mənzil, 12 ünvanında yaşayan Sevil Nəsirova ilə aralarında hansısa bir haqq-hesabı olub. O vaxtdan da, bu MTK-ya qarşı həmin şikayətçi qadının irəli sürdüyü əsassız iddia və ittihamlar tükənmək bilmir, hər yerdə, burada aldadıldığını iddia edir. Əslində isə, bəzi mətbu orqanlarda da dərcini tapmış bu məsələ tamamilə başqa cürdür. Yəni, bu MTK rəsmilərini yalandan ittiham edən həmin qadının həyat yoldaşı ilə, bir müddət burada sədr vəzifəsini icra etmiş həmin Ağamoğlan Ağayev yaxın dost olublar. Elə, bu yalan və uydurmalar da, həmin dostluqdan qaynaqlanır. Çünki, ortada, “Abşeron -- A1” MTK ilə, adı çəkilən şikayətçi qadının arasında bağlanmış heç bir rəsmi müqavilə sənədi yoxdur. Onun iddia etdiyi ödənişlərlə bağlı, şirkətin Maliyyə şöbəsində heç bir qeydiyyat aparılmayıb, adına heç bir rəsmi ödəniş qəbzinə rast gəlinməyib. Konkret desək, mənzil almaq məqsədilə, Sevil Nəsirovanın bu şirkətin hesabına heç bir ödənişi olmayıb. Bir sözlə, onun şirkətin sabiq sədr əvəzi Ağamoğlan Ağayevlə bağladığı saxta müqavilə və həyata keçirdiyi ödənişlər, -- əgər edibsə, -- şirkətdən kənarda baş verib.
Baş verənlərlə bağlı, şirkət rəsmisi Etibar Ağayev də araşdırmaçı jurnalistlərə bildirib ki, burada həyata keçirilən bütün ödəmələr qanun çərçivəsində aparılır: "Danılmaz faktdır ki, bizim MTK-da həyata keçirilən ən cüzi miqdarlı prosedurlar belə Maliyyə şöbəsi və Xəzinədarlıq tərəfindən qeydə alınır. Və buna görə, hər kəsə qəbz də verilir. Şikayətçi Sevil Nəsirova ilə bağlı apardığımız araşdırmalar zamanı isə, bəlli olub ki, şikayətçinin etdiyi iddialar tamamilə əsassızdır. O ki qaldı Sevil Nəsirovanın şikayətində deyilənlərə, bu, şirkətin əvvəlki direktoru Ağamoğlan Ağayevin onunla bağladığı və əlində bərk-bərk tutduğu saxta müqavilə, onlar arasındakı qaranlıq bir şəxsi məsələdir və şirkət xaricində baş verib. Bundan sonra yaşanan hansısa problemlərə görə də, Sevil Nəsirova evdən uzaqlaşdırılıb. Bunu tam dəqiqliklə deyə bilmərik. Çünki, bununla bağlı, əlimizdə rəsmi sübut yoxdur. Ağamoğlan Ağayev vəzifəsindən uzaqlaşdırılarkən, şirkətin təhvil-təslimi zamanı da, Sevil Nəsirova adına heç bir ödəniş qəbzinə rast gəlməmişik. Doğrudan da, onun həyata keçirdiyi ödənişlərlə bağlı, bizim MTK-da heç bir dəlil-sübut yoxdur. Bir daha deyirəm, bunun da əsas səbəbi odur ki, adı çəkilən qadın nə qədər ödəmələr həyata keçiribsə, bütün bunların hamısı şirkətdən xaric baş verib".
Araşdırmalar zamanı, şirkətin Xırdalan şəhərində tikdirdiyi yaşayış kompleksindən ev almış 500 nəfər sakin arasında, rəhbərliklə hansısa problemi olan bir kimsəni tapmadıq. Bu bir həqiqətdir ki, bu MTK ilə hüquqi müstəvidə müqavilə bağlayan sakinlərin hamısı hər ay ödənişləri rəsmi qaydada həyata keçiriblər və hər hansı qanun pozuntusu da baş verməyib. Doğrudan da, həyata keçirilən ən cüzi miqdarlı prosedurlar belə, Maliyyə şöbəsi və Xəzinədarlıq tərəfindən qeydə alınıb. Elə, bunun nəticəsidir ki, hər kəs aldığı evində rahat və problemsiz yaşaya bilir. Sakinlərə göstərilən nümunəvi xidmət artıq hər kəsə bəllidir. Elə, sakinlərə göstərdiyi yüksək xidmətə görə də, "Abşeron -- A1" ölkənin seçilən tikinti şirkətlərindən biri kimi tanınıb.
"Abşeron -- A1" MTK-nin təsisçisi kimi özünü qələmə verən və hər dəfə qarşımıza çıxıb, ağlına gələni danışan Elman Babayev aramızda olan bu ziddiyyəti, Azərbaycan və Ermənistan arasında olan müharibəyə bənzədərək, sonda bağlanan sülh müqaviləsi ilə müqayisə edir!", -- bu, həmin şikayətçi qadının daha bir absurd iddiasıdır. Göründüyü kimi, beləcə, o, aidiyyatı dövlət qurumlarına, eləcə də ölkə mətbuatına yazdığı şikayət xarakterli müraciətlərini ağlına gələnlərlə uzlaşdırmağa çalışır, iddia və ittihamlarına siyasi don geydirməkdən, hətta bu qaranlıq məsələdə "qazanacağı qələbəni" Vətən Müharibəsindəki Zəfər Qələbəmizlə müqayisə etməkdən belə çəkinmir. Beləcə, şirkət rəsmisi Elman Babayevi nə yolla olursa-olsun "vurmağa" çalışır.
44 günlük Vətən Müharibəsindən söz düşmüşkən, araşdırma apardığımız zaman o da məlum oldu ki, Azərbaycan torpaqları uğrunda vuruşan Milli Ordumuza dəstək üçün, bu şirkətin rəhbərləri əllərindən gələni əsirgəməyiblər, gücləri nəyə çatıbsa, şanlı qələbəmizə öz töhfələrini veriblər. Döyüşən əsgərlərimizin ərzaq, su və s. ehtiyacları üçün yardımlar edib, yaralılara kömək üçün çalışıblar. Bir sözlə, cəbhə bölgəsində gedən qızğın döyüşlərdə ordumuza dəstəyi özlərinə mənəvi borc biliblər. Bu barədə, şirkət rəhbərliyinin adına, "N" saylı hərbi hissə komandiri adından Təşəkkürnamə də var.
Bəli, "Abşeron -- A1" MTK ölkənin seçilən belə bir tikinti şirkətlərindəndir. Ünvanına hansısa bir iddia və ittiham əsassızdır. Konkret desək, “Abşeron -- A1”-ə qarşı irəli sürülən iddia və ittihamların heç bir hüquqi əsası yoxdur. Bir də ki, şikayətçi qadınla bağlı baş verənlər şirkətin ərazisində deyil, kənarda baş verib. Doğrudan da, onunla bağlanan saxta müqavilə barədə, MTK-da heç bir məlumat olmayıb. Yaxşı olar ki, Sevil Nəsirova Ağamoğlan Ağayevlə aralarında olan bu məsələni, bu şirkətdən kənarda aydınlaşdırsınlar.

araz.az xəbər portalının araşdırma mərkəzi.

YUMŞAQ SƏSİN ZƏNGULƏSİ

WhatsApp Image 2021 04 18 at 21.27.20

Azərbaycan radiosunun əməkdaşı olduğum illərdə efirə gətirdiyim proqramlardan biri də “Axtarış” idi. Gənclik redaksiyasında işləyirdim deyə bu verilişə daha çox cavanları dəvət edir, onları axtarıb tapır, üstün cəhətlərindən söhbət açır, danışdırır, söz, könül mülklərinə güzər edirdim. Amma sonralar “Axtarış”in sərhədlərini bir az da genişləndirdim, istədim çağdaş gənçliyimizi həm də vaxtilə, tutaq ki, 20-30 il əvvəl el arasında populyar olmuş, adı dillərdən düşməyən, sonralarsa zamanın, taleyin hökmüylə unudulmuş, tərki-dünya olmuş, hardasa incimiş, küsmüş insanlarla-elm, mədəniyyət xadimlərimizlə tanış edəm. Bu məqsədlə ara-sıra ”Axtarış”ın böyüdücü obyektivini belələrinə sarı tuşlayır, onları dindirir və hər belə efir görüşlərindən sonra gənclərimizin xoş reaksiyasının şahidi olurdum. Çünki gənclik həm elm, mədəniyyət, sənət tariximizin yaxın keçmişiylə tanış olur, həm də özlərini gələcək həyata, bəzən də çətin, keşməkeşli mübarizələrə bir növ səfərbər edirdi. Bundan savayı, elə verilişin efir dəqiqələrində ürəyini boşaldan, ümdə istək və arzularını dilə gətirən yaşlı insanlar da unudulmadıqlarına görə xoşhal olur, həyata, yaşamağa daha möhkəm tellərlə bağlanırdılar.
Gün o gün oldu ki, “Axtarış” xanəndə Novruz Feyzullayevi axtarıb tapdı. Ötən əsrin 60- cı illərindən başlayaraq bir-neçə onillər boyu Azərbaycan efirində özünün yumşaq səsi, həlim ləfzi, bizlər üçün yeni olan qəribə zəngulələri ilə cövlan eləyən bu müğənni sonradan elə bil qeybə çəkilmişdi. Uzun fasilələrlə radiomuzun musiqi proqramlarından səsi eşidilsə də sənətə axınla gələn xanəndə və mügənnilərin tünlüyündə Novruz Feyzullayev elə bil susmuş, bir küncə qısılmışdı. Amma onun sənətinə bələd olanların xatirində Novruz özünün “Nazlana nazlana”, ”Ayrılıq”, ”Heydər baba”, ”Təbrizim”, ”Qaragilə” mahnıları, ”Hümayun”, ”Dəşdi” muğam dəsgahlarıyla yaşamağındaydı. Bir də ki, təkrar edirəm, həzin səsi, yumşaq zəngulələri və ...Təbrizli ləhcəsiylə. Elə bu sadaladıqlarımın işığında onu axtarıb tapdım, çoxdan yadırğadığı, amma özünə dost, həmdəm bildiyi doğma radiosuna dəvət etdim. Mikrofonu açmazdan öncə bir xeyli söhbətləşdik. O vaxt mən İran İslam Respublikasına səfərdən təzə qayıtmışdım. Orda gördüklərimdən, təbii ki, Təbriz günlərindən, Saat qabağı meydanından, Şah gölündən, Firdovsi xiyabanından, Ərdəbildə Şah İsmayıl məqbərəsi önündə şəkil çəkdirməyimdən danışdım. Bir də baxdım gözləri dolub. Dedi ağa, sən neylədin, barigahımı dağıtdın ki! İllərdən bəri görməkdən yana burnumun ucu göynəyən o yerlərə, küçələri müsk-ənbər ətirli Təbrizimə aparıb gətirdin məni. Və elə bu yerdəcə qəriblik məfhumuna münasibətini öyrənmək istədim. Çünki, qəddar zamanın vahiməli küləkləri ağuşunda Arazı adlayıb quzey Azərbaycana pənah gətirmiş cənublu soydaşlarımızın – Rübabə Muradovanın, Söhrab Tahirin, Əbülfəz Hüseyninin, Mədinə Gülgünün, Hökumə Billurinin, vaxtilə anadan olduğum İsmayıllı rayonuna pənah gətirmiş, atamın da, şəxsən mənim də isti münasibətlərdə olduğum Ağa Sadiqinin, Əsgər Şahbazzadənin, İmran, Böyükağa dayılarının gözlərində yuva salmış qəribliyin zəif şüasını sezmişdim. Bu üzdən onu dindirmək istədim, dedim baxıram sizə, gözlərinizə ... Dalısını gətirməyə qoymadı. Qayıtdı ki, müəllim, insan olan kəs vətənində, doğmaları arasında özünü qərib saymaz. Qəriblik onda baş verər ki, səni saymayalar, qabağına bəndlər, hasarlar çəkələr. Mən burada özümü daim Təbrizimdəki kimi hiss eləmişəm. Amma olub, elə məqamlarla üzləşmişəm ki, nəinki Bakıdan, nəinki Təbrizdən, Ərdəbildən, vallahi baş götürüb bu dünyanın özündən getməyim gəlib. Bax o anlarda özümü qərib sanmışam. Nə yaxşı ki, sənətim olub, radioda, televizionda, el məclislərində oxuyub dərdimi, məlalımı dağıtmışam, rahat olmuşam, özümü evimdə bilmişəm. Yox, mən qərib deyiləm!
Mikrofon açılanda isə ilk sualım belə oldu: -- Novruz müəllim, siz özünüzü xanəndə sayırsız, yoxsa müğənni, yəni istərdim bu iki məfhuma aydınlıq gətirəsiz. Sualıma əlüstü cavab verdi, bununla da radio müsahibəmiz baş alıb getdi:
-- Xanəndəylə müğənni sözlərinin kökü eynidir. Yəni oxuyan. İntəhası muğam, dəsgah oxuyana xanəndə, mahnı oxuyana isə müğənni deyirlər. Çünki nə qədər muğam meyilli olsam da mahnılarsız ötüşmürəm. Məsələn 30 ildən çoxdur mənim “Humayun” muğamım radio efirindən düşmür. Burda mən əlbət ki, xanəndəyəm. Amma özümün bəstələdiyim mahnıları oxuyanda məni müğənni kimi təqdim edirlər və düz də eləyirlər. Amma bir gileyim var ki, qoşduğum mahnıların bəstəçisi olsam da öz adımla getməyə icazə vermirlər, deyirlər sən bəstəkarlığı qurtarmamısan, otur yerində (gülür). -- Xanəndə qocalırmı, ümumiyyətlə oxuyanın qocalığı özünü nədə göstərə bilər, ya bəlkə əsil oxuyan üçün yaş həddi mövcud deyil. -- Özümdən danışa billəm. Vallahi – billahi oxuyarkən özümdə belə halı hiss eləməmişəm. Xanəndə yaşa dolduqca sənətin zirvəsinə doğru gedir, səsinin imkanları müqabilində muğamın daha dərin qatlarındakı sirrləri görür. Əyər oxuduğu ahənglə sözü mahiranə birləşdirə bilirsə ona necə qoca demək olar? Hal – hazırda mən yaradıcılıqla məşğulam. Unudulmuş muğamlarımızı, onların guşələrini tapıb yerbəyer eləyirəm. Məsələn “Əfşar” adlı bir muğam var. Çox möhtəşəmdir. Onun bəzi hissələrini radioda, televizorda oxumuşam. Amma hələlik çiy haldadı. İnşaallah dəsgah tam hazır olandan sonra mən onu oxuyum siz də qulaq asın, görün qocanın canında nələr var.
-- Novruz müəllim, adın çəkdiyiniz “Əfşar” ayrıca muğamdı, yoxsa bizə məlum olan muğamların tərkibində bir guşədir?
-- Gözəl sualdır. “Əfşar” muğamdı, dəsgahdı, 12 hissədən ibarətdi. Bu hansısa muğamın tərkibində olmayıb. Müstəqil həyatını yaşayıb və yaşamaqdadı. İntəhası istər Iranda, istərsə də digər şərq ellərində çox nadir, ustad sənətkarlar ona müraciət ediblər.
-- Hər halda mən inanıram ki, bizdə qəbul olunmuş, böyük Üzeyir bəyin nota saldığı 7 muğamımızda “Əfşar” dan bəzi məqamlar olmasın.
-- Mən öz fikrimi bildirəcəm. Mənə elə gəlir ki, yüz illər boyu İranda, cənubi Azərbaycanda, lap elə şimali Azərbaycanda da xanəndələrin oxuduğu bu muğamı nədənsə bu tayda unudublar. Yoxsa muğamlarımızın sayı 7 yox, indiyə 8 olardı.
-- Sizə demək artıq olar ki, muğamlarımızı özünün təlqin elədiyi ovqata görə bəzən qəm muğamı, bəzən dəm muğamı adlandırırlar. Bəs “Əfşar” muğamını xarakteri etibarı ilə hansı qismə aid etmək olar?
-- Bunda daha çox lirika özünü göstərir. İstər bəmində, istər zilində, istərsə də təsniflərində. Son dərəcə həzin, hətta kədərlidir. Nə bilim vallah, bəlkə elə həddən artıq qəmgin ovqatlı olduğuna görə bu muğamdan vaz keçiblər. Amma unutmaq olmaz ki, sevinclə kədər qapıbir qonşudurlar. Biri bitəndə biri başlayır, biri başlayanda o biri bitir.
-- Hər halda böyük intizarla “Əfşar” muğamının ifanızda səslənəcəyi günü gözləyirik. Bu yerdə bir daha səs məsələsinə qayıdıram. Bizim ifaçılıq sənətimizdə bir neçə sənətkar var ki, səsləri bənzərsizdi, onları istəsələr də təkrarlaya, yamsılaya bilməzlər. Məsələn Qulu Əsgərovun, Qədir Rüstəmovun, Mirzə Babayevin, Oqtay Ağayevin səslərini kim çıxara bilər? Necə deyərlər, ayaqqabılarını geyə bilərlər, amma yerişlərini yeriyə bilməzlər. Mən məmnuniyyətlə sizin də səsinizi bu sıraya daxil edərdim. Həzin, ahəstə səs tembri, sözlərin aydın, dəqiq tələffüzü və sair. Bəs siz səsiniz barədə nə fikirdəsiz, ondan bir sənətkar ömrü ərzində yetərincə istifadə edə bildinizmi, bu sarıdan ürəyinizdə nigarançılıq, nisgil qalmaylb ki ?
-- Qalıb. Ona görə ki, bu səslə istər keçmişlərdə, yəni hələ İranda yaşarkən, istərsə də indilərdə çox işlər görmək istəmişəm, amma görə bilməmişəm. Bax, sinnimin bu vədəsində, səsimin bu mərhələsində, biliyimin, dünyagörüşümün indiki dönəmində bir yeni sıçrayışa hazırlaşıram. Hədsiz – hüdudsuz layihələrim, planlarım var. Mənə güc, qüvvət, həvəs verənsə Arazın bu tayındakı Azərbaycanımın müstəqilliyi, öz sözünü özünün deməsidir. Gün o gün olsun ki ...(səsi qırılır, kövrəlir.)
-- Səsiniz, ifanızla ötən əsrin 60-cı illərindən bəri tanış ola bildik. Yəni cənubi Azərbaycandan köçüb Quzey Azərbaycana gələndən sonra. Soruşmaq istərdim, orda, doğma yurd-yuvanızda nəyiniz qaldı. Mən təkcə qohum - əqrəbanı, doğmaları nəzərdə tutmuram, ümumiyyətlə daha böyük mənada güney Azərbaycanda nələri qoyub gəldiniz?
-- Əvvələn onu deyim ki, mənim bu “Cənub”, “Şimal” deyimlərindən xoşum gəlmir. Məndən ötrü Azərbaycan yekdir, bütövdür. Nəyi qoyub gəlməyimi soruşursunuz. 30 milyondan çox qardaş-bacılarımı, İranın hər buçağından, hər guşəsindən qulağa dəyən Azərbaycan türkcəsini, şirinli-acılı nəğmələri, aşıq havacatlarını. Hələ mən şairləri, rəssamları demirəm. Bir sözlə hünərməndləri qoyub gəlmişəm. Bəli, siz mənim səsimlə 60-cı illərdə tanış oldunuz. Amma sənətə gəlişim 1942-ci ildə olub. Ərdəbildə Səfəviyyə mədrəsəsində oxuyanda böyük qardaşım əlimdən tutub dostu, gözəl xanəndə Mirzə Əliağanın yanına aparardı ki, mənə oxumağın yollarını öyrətsin. Həmin ildə ustadım mənə dörd muğam oxumağı öyrətdi. “Humayın” idi, “Dəşdi”, “Bayatı-türk”, bir də ki, ”Əfşar” muğamlarıydı.
-- “Bayatı-türk” dediniz, bəlkə “Bayatı-kürd”ü nəzərdə tutursunuz ?
-- Yox, yox, “Bayatı-türk”. Oradan gələndən sonra istədim sizin bu radionuzda oxuyum, qoymadılar ki, ay aman orda ”türk” sözü var. İnşaallah onu da bu yaxınlarda dirildəcəm. Yeri gəlmişkən deyim ki, Ərdəbildə olarkən adın çəkdiyim “Əfşar” muğamını o qədər yaxşı oxumuşdum ki, ərdəbillilər məni o muğamın adıyla – Novruz Əfşari deyə çağırırdılar. Ta 60- cı illərəcən bu adla tanınmışam. Bura gələndən sonra oldum Feyzullayev.
-- Bir vaxtlar İran radiolarından verilən muğam konsertlərinə həvəslə dinşək kəsilərdik. Xüsusilə Əbülhəsənxan İqbalın, Mustafa Payanın səsləri bizləri valeh edərdi. Onlarla necə, əlaqələriniz olubmu ?
-- Əbülhəsən xan sıradan bir xanəndə olmayıb, böyük mənsəb sahibiydi. Təbrizin rəisi - şəhridarıydı, yəni şəhərin meri. Tehrana gəlişində mən şəxsən onun ziyarətində olmuş, məsləhətlərini dinləmişəm. “Ayrılıq” mahnısını yazan Əli Səlimi oxuyarkən tarda məni müşayət edərdi. Bir yerdə işləmişik onunla. Yazdığı mahnıların çoxunun ilk ifaçısı mən olardım. Mustafa Payanla da Tehranda bir yerdə oxuyardıq. Orada mehmanxanası vardı. Ailəvi dost idik. Bu taya gələndə məni yola salanlar arasında o da vardı. Qardaşı Əli Zərgərə məxsusi salamlarını yetirməyi gözləri yaşlı halda məndən rica elədi. Mən də bura gələn kimi onun arzusunu yerinə yetirdim.
-- 90- cı illərin ortalarıydı, mənim İran İslam Respublikasına bir səfərim oldu, turist kimi. Vaxtilə radiomuzun “Bulaq” verlişinin redaktoru olduğumdan xəbər tutanlar Təbrizdə qaldığım oteldə məni axtarıb tapmışdılar. Həm onlarla, həm də digərləriylə apardığım söhbətlərdən bir şey mənə aydın oldu ki, orda demək olar hamı şeir yazır, səninlə şeir dilində danışır. Yəni sənətin başqa sahələri yoxdurmu ki, onlar şeirə üz tuturlar?
-- Dadaş, İranda Azərbaycan türksəsində məktəb yox, universitet yox, gecə-gündüz radio-televizionlar farsca danışır. Üstəlik də ta qədimlərdən bizlərdə çalıb-oxuyan, atılıb-düşən, oynayanlara pis baxıblar. Bəs bu adamlar neyləsin? Ona görə də özlərini veriblər söz, şeir səmtinə. Buna pis baxmaq lazım deyil. Dərdin, məlalın, sevgi, mərhəmət, vətənpərvərlik duyğularının izharının bircə yolu vardır ki, onun da adı şeirdir. İranda belələrinə hünərmənd, yəni hünər sahibləri deyirlər.
-- Bəlkə də bu sualımdan inciyəcəksiz, dediklərim xətrinizə dəyəcək, amma özümü saxlaya bilmirəm. Sizin oxu üslubunuza, xüsusən də muğamlarınıza İran-fars yolu xasdır. Hərçənd mən bunu qəbahət saymıram, muğam qoca Şərqin müştərək sərvətidir. Amma heç bu barədə, yəni stilinizdə dəyişiklik eləmək barədə fikirləşmisiz? -- Mənim Arazın o tayındakı stilim necə olubsa onu özümlə bu taya keçirib gətirmişəm. Məncə bunu mənə bağışlamaq olar. Çünki bir qayəm, bir arzum olub- milli musiqimizi pərvazlandırıb göylərə qaldırmaq. Ola bilsin orada doğulub boya –başa çatdığımdan, oranın musiqisini çox eşitdiyimdəndir ki, o ləhcə, o avaz canıma hopub, dilimdə yuva salıb. Amma bu olsa-olsa ləhcə, dialekt fərqidir. Bu fərqi hər hansı bir diyarın ayrı-ayrı bölgələrində də müşahidə etmək mümkündür. Məsələn Ərdəbillilər deyir”a yetim, nəğareysən, hardan gəleysən, hara gedeysən?” Amma görün təbrizli necə deyir, “dadaş, nə deeirsən, hardan gəliirsən, hara gediirsən?” O da Azərbaycanlıdı, bu da, xırda ləhcə tafavütü var. Bax, mənim ifalarımda duyduğunuz o xallar ki var, sırf ləhcə işidir, başqa bir şey deyil, ola da bilməz. Əbdülhəsən xan İqbalda da bu vardı, Mustafa Payam da, Ququşda da. Amma hamısı Azərbaycanlıydılar.
-- Artıq xeyli vaxtdır bir zamanlar radionun, televiziya ekranının bəzəyi olan Novruz Feyzullayev sənət dairələrində bir qədər seyrək görünür. Sənətkar olaraq bu sizi sındırmır ki?
-- Yox, sındırmır. Ona görə ki, həvəsdən düşməmişəm. Səsimdəki öz yerindədir, sözümə baxır, hara deyirəmsə oraya gedir. Dövlət Teleradio Şirkətindən çox razıyam ki, səsim yazılmış lent yazılarını qoruyub saxlayır, vaxtaşırı səsləndirir, məni elin yaddaşından silinməyə qoymur. Bir az yeni araya-ərsəyə gələn özəl, qeyri dövlət radio- televizionlarından gileyim var. Ucuz şoulara çox yer verirlər, əsil sənəti qapı dalında saxlayırlar. Bax, o dediyiniz qocalıq var ha, sənətkar onda qocalır. Belə yaramaz. Sənətkarı hər yaşda dindirib danışdırmaq lazımdır.Onlardan öyrəniləsi, görüb-götürüləsi çox şeylər var. O ola ki, mən təki cavan oğlandan (gülür) ...
O güldü, mən də güldüm və bizim söhbətimiz üçün ayrılan vaxtın daraldığından narazı qalsam da görüşümüzə razılıq verdiyinə görə təşəkkürümü bildirib əl-ələ görüşdüm. Sonra söhbətimizin lentə alındığı studiyadan çıxıb pillələri enə-enə ona dedim çox sağ olun ki, “Axtarış” verilişinin bu sayının araya-ərsəyə gəlməsi üçün çox axtarmalı olmadıq, çox arzulardım ki, uzun və uzun illər beləcə axtardığımız yerdə tapaq sizi. Özü də bax belə şən, gümrah, sevdiyiniz, könül bağladığınız sənətin sükanı arxasında. Oxuyun, həmişə oxuyun və bu oxumaq sədaları altında daim sizi anaq, sizdən sənət inciləri umaq.
Bu sözlərimdən onun alındığını duydum. Şükranlarını mənə əllərimi bərk-bərk sıxmağıyla bildirdi. Və bu təmasdan ürəklənib ona daha bir sual verdim, mikrofonsuz-filansız.
-- Ərdəbilə, Təbrizə, bir sözlə ana vətənə getməyiniz gəlirmi?
-- Hələ ki yox.
-- Niyə?
-- Niyəsini soruşma . Çün istək başqadır, şərait, səbəblər başqa. Bircə orasını deyim ki, 45-ci ildə cənubda Milli Hökumətimiz yarananda mən artıq Təbriz filarmoniyasının solisti idim. Orada ta qədimlərdən çox möhtəşəm bir orkestr fəaliyyət göstərirdi. Müstəqillik aylarında daha da qol-budaq açmışdı. Cahangir Cahangirov, Hacı Xanməmmədovla da orda tanış oldum. Həmin orkestrdə işləyir, dirijorluq edirdilər. Cibim həmişə pullu olub, el məclislərindən yaxşı qazanardım. Amma iş yerimdən ilk dəfə Milli Hökümətimizin pulunu alanda o 150 tümən pulun üzərinə göz yaşlarım ələndi. Çünki o mənim doğma pulum idi, müstəqil dövlətimin göstəricilərindəndi. Sonra da... sonrası sizə məlumdur... Hər şeyi zaman həll eləyir. Zaman yetişər verdiyiniz suala “yox”əvəzinə “hə” deyə cavab verərəm.
Novruz Feyzullayev (Əfşari) ilə bu söhbətimin alındığı tarix 2001-ci ilin Novruz ayına təsadüf eləmişdi. Şən, qıvraq, həyat eşqiylə ləbaləb dolu bir insanla şəxsən tanış olmuşdum. Sevinir, qürur duyurdum, sənətimə minnətdarlıq edirdim ki, sayəsində daha bir dost qazanmışam. Oxuyarkən səsində üzə çıxan həzinliyin, bir növ pıçıltıya bənzər həlimliyin tam əksi olaraq həm də həyatda sərt idi, ötkəm idi, hər an amalı, əqidəsi uğrunda döyüşə atılmağa hazır idi. Arada sənət adamlarının ən incə yeri olan ad, titul məsələsinə də toxunub qırımını yoxlamışdım. Adıma nə gəlib ki, dadaş, demişdi. Bəsimdi deyələr ki, oxuyur Novruz Feyzullayev. Təki Allah səsimə qıymasın, qalanı düzələn şeydi.
Ayrıldıq və haqqında danışdığı layihələri həyata keçirəndən sonra bir daha görüşüb söhbət edəcəyimizin ”hə”sini ondan aldım. Sonra, günlərin bir günü radiodan “Heydər baba” mahnısını dinləyən təki evlərinə zəng vurdum ki, hal-əhval tutam, bir də görüşək. Dedilər yerində yoxdur və bir daha olmayacaq. O boyda sənətkar səsindəki həlimliyin özü kimi, haysız - küysüz, pıçıltıya bənzər bir sakitliklə dönyasını dəyişibmiş sən demə. O, bu, daha ona zəng eləmirəm. Bilirəm ki, yerində deyil. Amma həm də yerindədir məncə, canı, qanı qədər sevdiyi, özünü heç zaman qərib saymadığı Vətən torpağının altında. Oraya köç edib ki, cismi ilə torpağı bir az da qabartsın, artırsın, aradabir Vətən göylərində havalanan mahnıları, muğamları, yumşaq zəngulələri ilə həm ona, həm özünə layla çalsın, salam versin.WhatsApp Image 2021 04 18 at 21.28.04

İntiqam MEHDİZADƏ.

Alimlər möcüzəvi ərzaq tapdı: Hər kəsin evində var və çox ucuzdur

Screen Shot 2019 12 03 at 1.19.20 PM 1

Mütəxəssislər insan orqanizmi üçün olduqca xeyirli ərzaq tapıblar.

araz.az xəbər verir ki, Böyük Britaniyada Ekseter Universitetinin apardığı araşdırma göstərib ki, əgər çuğundurdan mütəmadi istifadə olunarsa, insan orqanizminə möcüzəvi təsir göstərir. Xüsusilə qan damarları və beynin daha yaxşı fəaliyyəti üçün çuğundur əvəzolunmaz məhsul adlandırılıb.

Mütəxəssilərin araşdırması göstərib ki, ağızdakı bakteriyalar çuğundurdakı nitratları azot oksidə çevirir, bu da qan təzyiqinin tənzimlənməsinə kömək edir.

Həmçinin bu məhsul fol turşusu, C vitamini, kalium və fosfor, B1, B2, B3 və B6 vitaminlərinin, mineral maddələrin, dəmir və yod mənbəyidir. Çuğundur antioksidantlarla da zəngindir, bu məhsulun müntəzəm istifadəsi dırnaqları, dərini və saçları sağlamlaşdırır. Tərkibində lifin miqdarı yüksək olduğu üçün çuğundur qəbizliyin qarşısını alır.

Xəzər
Cebhe.info

Bir parka 1.7 milyon “silən” icra başçısı həbs edilə bilər

ziyeddin eliyev

Adı rüşvət, korrupsiya cinayətlərində hallandırılan Quba rayon icra hakimiyyətinin başçısı Ziyəddin Əliyev həbs edilə bilər.

Gununsesi.info Avropada yaşayan mühacir jurnalist Cavanşir Həsənliyə istinadən bildirir ki, Ziyəddin Əliyevlə bağlı korrupsiya cinayəti üzrə araşdırma aparılır.

Səbəb isə Zərdabi qəsəbəsində 300-400 min manatlıq işlərinə 1,7 milyon manat silinməsidir:

“Buyurun siz də qəsəbədə ötən il “1.7 milyon manata abadlaşdırılmış” Həsən bəy Zərdabi parkının fotolarına baxın”.

 

Gununsesi.info

 
 
 
 
 
 
 
 
 

Azərbaycan abidələri - iki fərqli baxış

bandicam 2021 04 18 19 36 42 327

18 Aprel Beynəlxalq Tarixi Abidələrin Mühafizəsi Günüdür

18 aprel YUNESKO-nun abidələrin və diqqətəlayiq yerlərin mühafizəsi məsələləri üzrə Beynəlxalq Şurasının 1983-cü ildə qəbul edilmiş qərarı əsasında qeyd olunur. Məqsəd dünya ictimaiyyətinin diqqətini maddi-mədəniyyət abidələrinin qorunmasına yönəltməkdir.WhatsApp Image 2021 04 18 at 21.50.40

Tarixi abidələr-məqbərələr, saraylar, məbədlər, məscidlər, qəbiristanlıqlar, körpülər, ovdanlar, günbəzlər, minarələr və s. tarixi keçmişimizin maddi yadigarlarıdır. Onlar zamanın sərt sınaqlarına sinə gərərək bu günümüzə gəlib çatmışlar. Hər bir ölkənin tarixinin qədimliyi onun maddi-mədəniyyət yadigarlarının çoxluğu və qədimliyi ilə ölçülür.WhatsApp Image 2021 04 18 at 21.50.41

Bu sahədə Azərbaycan xalqının bəxtinə iki fərqli tale düşüb. Müstəqil Azərbaycan Respublikasında qədim abidələrimizin qorunması, bir sözlə nəsillərdən-nəsillərə çatdırılması üçün problem, qorxu yoxdur. Əsas narahatlıq isə Güneyimizdəki abidələrin taleyi ilə bağlıdır ki, bu barədə araz.az-a narahatlıq doğuran məlumatlar təqdim olunmaqdadır.WhatsApp Image 2021 04 18 at 21.50.40 1

Başlayaq birincidən: Bildiyiniz kimi Qobustan, Gəmiqaya, İstisu qayaüstü təsvirləri, Çıraqqala, Oğlanqala, Cavanşir, Gülüstan, Əlincə, Buğurd, Gələrsən-Görərsən kimi qalalarımız, Möminə xatın, Yusif ibn Küseyr, Olcaytu Xudabəndə məqbərələrimiz, Göy məscid, Şah Abbas məscidi, Gövhərağa məscidi, Cümə məscidi, Təzəpir məscidi kimi dini ibadətgahlarımız, Həşt behişt, Şirvanşahlar, İrəvan sərdar sarayı, Şəki xan sarayı kimi nadir memarlıq abidələrimiz bütün dünyada tanınır.WhatsApp Image 2021 04 18 at 21.50.41 1

Həmin siyahını daha da genişləndirə bilərdik. Çox təəssüf ki, erməni işğalından azad olunan Qarabağımızda dünya şöhrətli abidələrimizin bir çoxunun varlığına son qoyulub.

Tarixi arayış. Birinci Qarabağ müharibəsi nəticəsində Ermənistanın işğalı altında qalan torpaqlarımızda 500-dək tarixi-memarlıq, 100-dən çox arxeoloji abidələr, on minlərlə eksponat olan 22 muzey, 4 rəsm qalereyası, 46 milyon kitab və əlyazmalar saxlanılan 927 kitabxana, 808 klub, 10 istirahət və mədəniyyət parkı, 85 musiqi və incəsənət məktəbi, 20 mədəniyyət sarayı, 4 dövlət teatrı qalmışdır. İşğal altında olan ərazilərimizdə xalqımızın keçmişi və bu gününü əks etdirən 1852 mədəniyyət və incəsənət abidəsi erməni vandalizminin təcavüzünə məruz qalmışdır. Nəticədə tariximiz üçün mühüm əhəmiyyət kəsb edən, milli özünəməxsusluğu özündə əks etdirən minlərlə tarixi və arxeoloji abidələrimiz məhv edilmişdir.WhatsApp Image 2021 04 18 at 21.50.41 2

Azərbaycan dövləti heç olmasa iki divarı qalan abidələri əvvəlki görkəminə qaytarmağı planlaşdırır. Prezident İlham Əliyev dünya əhəmiyyətli mədəni-tarixi abidəmiz Azıx mağarasına baş çəkərkən bu fikirləri söyləyib. Bura dünyanın ən qədim insan yaşayan məskənlərindəndir. YUNESKO-nun siyahısına düşmüş bu mağaralardan tapılmış maddi mədəniyyət nümunələri hələ 1981-ci ildə Parisin İnsan muzeyində "Avropanın ilk sakinləri" adlı sərgidə nümayiş etdirilmişdi.WhatsApp Image 2021 04 18 at 21.50.42

Bir çox ölkələrdə də tarixi abidələrin qorunması işi çox ciddi təşkil olunmuşdur. Məsələn, Fransada hətta arxeoloji qazıntılar aparıldıqdan sonra tarixi yerlərin təbii landşaftı olduğu kimi bərpa olunur. Böyük Britaniyanın şimalında da Roma imperatoru Adrianın dövründə imperiyanın sərhədlərini qorumaq məqsədilə çəkilmiş məşhur Adrian sədləri olduğu kimi qorunub saxlanır.WhatsApp Image 2021 04 18 at 21.50.40 2
Lakin bu sözləri heç də Güney Azərbaycandakı abidələrimizə bəslənilən dövlət qayğısı haqqında demək olmaz. Bir çox nadir memarlıq abidələri baxımsızlıq və tamah üzündən sökülüb-dağıdılmışdır, bir çoxunun gələcək taleyi müəmmalıdır. Bu barədə saytımızda da həyacan təbili döyülməkdədir.

 

 

araz.az xəbər portalı.

1 -dən səhifə 1437

Əlaqəli xəbərlər