Rəhim ƏHMƏDZADƏ,                                      AĞ Partiya başqan müavini ————————–

Türkiyədə İstanbul Bələdiyyə Başçısının həbsi Azərbaycanda da müxtəlif reaksiyalarla qarşılanıb. Azərbaycan sosial şəbəkələrində isə “Mən demişdim”, “Mən bilirdim” kimi fikirlər üstünlük təşkil edir. Sanki hər kəs özünü bir Nostradamus hesab edir.

Ölkəmizdə CHP tərəfdarları Əkrəm İmamoğlunun həbsini demokratiyaya zərbə kimi qiymətləndirir, Türkiyənin gələcəkdə zəifləyəcəyinə inanır və onun prezident olacağına böyük ümid bəsləyirlər.

Lakin məni düşündürən əsas məsələ tamam başqadır: Əgər Türkiyədə CHP hakimiyyətdə olsaydı, Azərbaycan Qarabağı işğaldan azad edə bilərdimi (Təbii ki, Qarabağı Azərbaycan Ordusu azad etdi. Lakin bu prosesdə Türkiyə iqtidarının – konkret olaraq Ərdoğanın siyasi dəstəyi və böyük güclərin Azərbaycana təzyiqlərinin qarşısını alması həlledici rol oynadı)? Mənim fikrimcə, hələ də Qarabağ işğal altında olardı və münbit torpaqlarımızda ermənilər yallı oynayırdı.

Azərbaycanda “demokratlar” düşünür ki, Ərdoğan hakimiyyətdən getsə, İlham Əliyevin mövqeləri zəifləyəcək və o da hakimiyyətdən gedəcək. Digərləri isə hesab edir ki, Putinin hakimiyyətdən getməsi İlham Əliyevin də getməsi ilə nəticələnəcək. Amma heç kəs öz uğursuzluğunu etiraf etmir.

Türkiyə siyasətində nələr baş verir?

Əkrəm İmamoğlunun həbsi fonunda hadisələrin hansı istiqamətdə inkişaf edəcəyini yəqin ki, Ərdoğan iqtidarı hesablayıb. Yox, əgər hesablamayıbsa, bu da ayrıca bir sualdır.

Bu təmtəraqlı həbs kimə lazımdır? İqtidar özü Əkrəm İmamoğlunu bu qədər şişirdir? Prokurorluğa çağırıb gəlmədiyi üçün səhər tezdən evində həbs etdirir? Yoxsa iqtidar Əkrəmlə anlaşmaya gedib?

Suallar çoxdur və yaxın gələcəkdə bütün bu məsələlərə aydınlıq gələcək.

araz.az xəbər portalı.