Bu gün uzun illərdir ki, peşəsinə sadiq qalan vəkil Fuad Ağayevin yazdığı kimi “Azərbaycan hüquq elminin və ədalət mühakiməsi sisteminin əfsanəsi, görkəmli dövlət xadimi və ictimai-siyasi xadim, hüquq elmləri doktoru, professor, Ədalət Partiyasının sədri, keçmiş Azərbaycan Prokuroru və Azərbaycan Respublikasının Ədliyyə Naziri İlyas Abbas oğlu İsmayılovun qırxı idi”.

Uzun illər ədliyyə və prokurorluq sistemində, nə qədər çətin olsa da, vicdanla işləmiş çoxlu sayda əməkdaşlar gördüm və bir daha anladım ki, həqiqətən həmin dövr çox çətin ki, bir daha təkrarlansın. Həmin işçiləri fərqləndirən ən böyük cəhət o idi ki, onlar “rəis həmişə düzdür” qaydasını qəbul etməyib öz prinsiplərini müdafiə etməyə çalışırdılar.

Uca Allah izni ilə öz xatirələrimi qələmə alası olsam İlyas İsmayılov haqqında çoxları üçün maraqlı olan xatirələrimi bölüşəcəm. Bir daha təkrar edirəm ki, 1989-cu ildən bu günə İlyas müəllimdə olan savad, dövlətçilik hissi, Xalq marağını hər şeydən üstün tutmaq, xüsusilə, kasıb təbəqədən olan insanları vəzifələrə təyin edərkən ölkənin Ali rəhbərliyi ilə konfliktə getmək qabiliyyəti, gözütoxluq ən azından Məhkəmə və Hüquq mühafizə sistemində gördüyüm rəhbərlərin cəmində olmayıb.

Mənim heç kimi, heç vaxt ilahiləşdirmək fikrim olmayıb. Uca Allahdan başqa, içi mən qarışıq nöqsansız insan olmayıb. Yəqin ki, İlyas müəllimin də nöqsanları olub, ancaq onların heç biri ona ömrü boyu, hakimiyyətdən, ən yaxınlarından belə olan çoxlu haqsızlıqlar əsas olmayıb. Həmin haqsızlıqları bu gün də gördüm.

Yaxınları özləri bilər, ancaq Hakimiyyət rəsmiləri heç olmasa indi onun Azərbaycan Dövləti və Xalqı üçün etdiklərini dəyərləndirməlidirlər. Bu günə qədər də çoxlu Baş Prokurorlar, Ədliyyə Nazirləri, Daxili İşlər Nazirləri, Ali Məhkəmə sədrləri də rəhmətə gedib (İsmət Qayıbovdan başqa) və onların heç birinin adı rəhmətə gedəndən sonra hər hansı şəkildə əbədiləşdirilməyib kimi bəhanələri də qəbul etmirəm. Ona görə də bir daha vurğulayıram ki, onların heç biri bu orqanlarda işləyənlər, xüsusilə gənclər üçün nümunə kimi qəbul edilməyib. İlyas müəllim isə çoxları üçün dillər əzbəri olub. Onun vaxtilə cəzalandırdıqları şəxslər belə heç vaxt onun sadaladığım keyfiyyətlərini danmayıblar.

Aslan İSMAYILOV,
hüquqşünas.

P.S. Təxminən 10 ilə yaxın İlyas müəllimlə danışmamışam. Bu məsələdə də məndə heç bir günah olmayıb. Buna günahkar olanların cavabını Uca Allahın verəcəyinə də heç bir şübhəm yoxdur. Bu günə qədər qələminə sadiq qalan çox nadir jurnalistlərdən biri Elxan Şükürlünün təkidi ilə təxminən 1 il əvvəl İlyas müəllimin bağına getdim və bir birimizlə heç nə olmamış kimi görüşdük. Nə o, nə də mən baş vermiş hadisə barəsində danışmadıq. Bu müddət ərzində dəfələrlə görüşdük, bilmədiyim çox hadisələrin də cavabını aldım və buna görə də bu gün çox məmnunam.

araz.az xəbər portalı.