Bakı şəhərindəki 231 nömrəli tam orta məktəbin işdən çıxarılan direktorunun sədası Qazaxıstana da çatıb.

“Araz” modern.az-a istinadən xəbər verir ki, Qazaxıstan mətbuatı da ad günü ilə bağlı müəllimlərin ona aldıqları 600 manatlıq hədiyyəni bəyənməyən və “Mənə belə dilənçi payı lazım deyil” deyən Lamiyə İlhamsoyla bağlı xəbəri tirajlayıb.

Qazaxıstanın “newtimes.kz” və “lada.kz” saytları xəbəri yaymaqla yanaşı, hətta Lamiyə İlhamsoyun bəyənmədiyi hədiyyənin dəyərini qazax təngəsilə də hesablayıblar. Xəbərdə bildirlib ki, 600 Azərbaycan manatının ekvivalenti 176 196 Qazaxıstan təngəsi edir. Qeyd edilib ki, azərbaycanlı məktəb direktoru 176 min təngəlik hədiyyədən narazı qalıb.

Xatırladaq ki, müəllimləri təhqir edən Lamiyə İlhamsoyun səsyazısı ictimailəşdiriləndən sonra Məktəbəqədər və Ümumi Təhsil üzrə Dövlət Agentliyi araşdırma aparıb və fəaliyyətində yol verdiyi nöqsanlara görə onu məktəb direktoru vəzifəsindən azad edib.

Ölkənin media vasitələri səs yazısına görə işdən qovulan direktor kimliyini də ictimaiyyətin diqqətinə çatdırıb. Bildirilib ki, ad gününə alınan hədiyyəni bəyənmədiyi üçün müəllimləri təhqir edən Bakının Pirallahı rayonu, Gürgən qəsəbəsi, 231 nömrəli tam orta məktəbin direktoru Lamiyə İlhamsoy 1984-cü il təvəllüdlüdür.O, 2005-ci ildə Azərbaycan Beynəlxalq Universitetininin Filologiya (ingilis dili) fakültəsini bitirib. 2005-2022-ci illərdə Nizami rayonu 277 nömrəli tam orta məktəbdə ingilis dili müəllimi vəzifəsində çalışıb.

2009-cu il tarixindən Yeni Azərbaycan Partiyasının üzvüdür.

Sabiq məktəb direktoru 2021-ci ildə YÜKSƏLİŞ müsabiqəsində, 2022-ci ildə “Məktəb liderliyi” proqramının təlimlərində iştirak etməsini avtobioqrafiyasına daxil edib.

Lamiyə İlhamsoy ümumtəhsil müəssisələrinə direktorların işə qəbulu üzrə müsabiqədə uğur qazanaraq 2022-ci il tarixindən Bakı şəhəri Pirallahı rayonu N.S.Teymurov adına 231 nömrəli tam orta məktəbə direktor vəzifəsinə təyin olunub.

araz.az xəbər portalı.