Noyabrın 27-də Azərbaycan Dövlət Pedaqoji Universitetində (ADPU) Türkiyənin Ali Təhsilin Keyfiyyəti Şurasının (YÖKAK), Təhsildə Keyfiyyət Təminatı Agentliyinin (TKTA), Azərbaycan Dövlət Pedaqoji Universitetinin (ADPU), Türkiyənin Sakarya və Çankaya universitetlərinin birgə təşkilatçılığı ilə keçirilən “Ali Təhsildə Keyfiyyət üzrə Beynəlxalq Konfrans (ICQH)” və “Beynəlxalq Müəllim Hazırlığı Konfransı (ITEC)”nın açılış mərasimi keçirilib.

Arazpress.com xəbər portalı ADPU-nun Filologiya fakültəsinin rəsmi internet səhifəsinin məlumatına istinadən bildirir ki, dahi şəxsiyyətlərin və şəhidlərimizin məzarlarının ziyarətiylə başlayan bu tədbirdə elm və təhsil ictimaiyyətinin nümayəndələri, ali təhsil və elmi-tədqiqat müəssisələrinin rəhbərləri, millət vəkilləri, diplomatik korpusların nümayəndələri, Azərbaycan və digər ölkələrdən olan alim və tədqiqatçılar iştirak ediblər.

Əvvəlcə tədbirin Türkiyə tərəfdən koordinatoru, Sakarya Universitetinin professoru Aytekin İşman və Azərbaycan tərəfdən koordinatoru, ADPU-nun tədris işləri üzrə prorektoru, dosent Eldar Aslanov çıxış edərək, konfranslara hazırlıq prosesi barədə ətraflı məlumat veriblər. Qeyd edilib ki, 2 gün müddətində işinə davam edəcək “Ali Təhsildə Keyfiyyət üzrə Beynəlxalq Konfrans”na 210-dan çox, “Beynəlxalq Müəllim Hazırlığı Konfransı”na isə 150-dən çox elmi məqalə və tezis təqdim edilib.

Açılış nitqi ilə çıxış edən ADPU-nun rektoru professor Cəfər Cəfərov qeyd edib ki, bu gün ali təhsildə keyfiyyətin yüksəldilməsi qlobal müzakirələrin əsas mövzularından biridir. Cəmiyyətin dinamik inkişafı, əmək bazarının yeni tələbləri və texnologiyaların sürətli transformasiyası ali təhsil müəssisələrindən daha çevik, daha dayanıqlı, daha innovativ yanaşmalar tələb edir. Bu kimi konfransların təhsil keyfiyyətinin yüksəldilməsi istiqamətində aparılan islahatların müzakirəsi və qlobal təcrübə mübadiləsi baxımından olduqca əhəmiyyətli platforma olduğunu vurğulayan rektor ölkəmizdə son illər ali təhsildə keyfiyyət təminatını gücləndirmək üçün həyata keçirilən sistemli islahatlardan söz açıb.

Natiqin nitqində o da qeyd edilib ki, beynəlxalq tələblərə uyğun akkreditasiya mexanizmlərinin tətbiqi ali təhsil sistemində şəffaflığı və məsuliyyəti kifayət qədər artırıb. Rəqəmsal idarəetmə, təhsil və təlim resurslarının modernləşdirilməsi ali təhsilin əlçatanlığını və effektivliyini yüksəldib. Müəllim hazırlığı, kadr inkişafı, kurikulum yenilənməsi və universitetlərin beynəlxalq reytinq sistemlərinə inteqrasiyası üzrə genişmiqyaslı proqramlar artıq öz nəticələrini göstərməkdədir. Bu islahatlar ölkəmizin ali təhsil sahəsində qlobal mühitə çevik inteqrasiyasını təmin edir.

C. Cəfərov diqqətə çatdırıb ki, müasir dövrün tələblərinə cavab verən, geniş kompetensiyalara malik, pedaqoji təfəkkürü inkişaf etmiş müəllimlərin yetişdirilməsi olmadan təhsildə keyfiyyətin davamlı olaraq təmin olunması mümkün deyil və bu baxımdan, “Beynəlxalq Müəllim Hazırlığı Konfransı” xüsusi əhəmiyyət kəsb edir. Bu konfrans qlobal miqyasda müəllim hazırlığı modellərinin, innovativ pedaqoji metodların, rəqəmsal təlim mühitinin və təhsilverənlərin peşəkar inkişafına dair ən son yanaşmaların müzakirəsi üçün geniş platforma təqdim edəcək. Dünyanın aparıcı universitetlərinin, təhsil ekspertlərinin, beynəlxalq təşkilatların və praktik müəllim hazırlığı mərkəzlərinin bir araya gəldiyi bu tədbir pedaqoji təhsildə yeni istiqamətlərin formalaşmasına töhfə verməklə yanaşı, ölkəmizdə müəllim hazırlığı sisteminin daha yüksək standartlara uyğunlaşdırılmasına da əlavə stimul yaradacaq.

Türkiyənin Çankaya Universitetinin rektoru, prof. Hadi Hakan Maraş və Sakarya Universitetinin rektoru, prof. Hamza Al, YÖKAK-ın sədri, prof. Ümit Kocabıçak və TKTA-nın İdarə Heyətinin sədri Tural Əhmədov çıxışlarında konfransın təkcə elmi müzakirə platforması deyil, həm də iki ölkənin ali təhsil sistemləri arasında bilik və təcrübə mübadiləsinin strateji mərhələsi olduğunu qeyd edib və konfransın tərəfdaşlarına təşəkkürlərini çatdırıblar. Konfransların ali təhsil sistemi üçün yeni əməkdaşlıq perspektivləri açacağına və birgə fəaliyyətlər üçün güclü stimul verəcəyinə əminlik ifadə edilib.

Açılış nitqlərindən sonra ADPU-nun Biologiya müəllimliyi ixtisasının son kurs tələbəsi Gülay İmanzadənin piano ifası təqdim edilib.

Daha sonra plenar iclasın açılış məruzələri dinlənilib. ADPU-nun rektoru, prof. Cəfər Cəfərov “Müasir müəllim hazırlığının keyfiyyət göstəriciləri”, YÖKAK sədri, prof. Ümit Kocabıçak “Ali təhsildə akkreditasiyaların önəmi və süni intellektin təsiri”, TKTA-nın İdarə Heyətinin sədri Tural Əhmədov isə “Ali təhsil müəssisələrinin institusional və proqram akkreditasiyası üzrə çağırışlar və gözləntilər” mövzusunda geniş məruzələrlə çıxış ediblər.

Açılış məruzələrindən sonra plenar iclasa yekun vurulub.

Plenar iclasdan sonra “Ali Təhsildə Keyfiyyət üzrə Beynəlxalq Konfrans” və “Beynəlxalq Müəllim Hazırlığı Konfransı” öz işini 18 bölmədə müzakirələrlə davam etdirib.

araz.az xəbər portalı.