Mətbuatın və sosial şəbəkələrin verdikləri məlumata görə, paytaxtın Xəzər rayonunun Binə qəsəbəsindəki Elçin Şəmiyev adına 149 nömrəli tam orta məktəbdə direktorun göstərişi ilə 8 Mart — Beynəlxalq Qadınlar Bayramı günü münasibətilə pul yığılır. Məlumatlardakı iddialara görə, məktəbin rus dilli bölməsinin yuxarı siniflərində təhsil alan şagirdlərdən 50 manat, Azərbaycan dili bölməsinin şagirdlərindən 30-40, aşağı siniflər üçünsə 20-30 manat arası pul yığımı həyata keçirilir. Birinci siniflər üçünsə bu rəqəm 30 manatdır. Üstəlik, hər sinifdən biri 10 manat olmaqla, uşaq sayına görə məktəbin rəhbəri Rəhilə Baxşiyevaya pul verilməlidir.

Göstərilən qanunsuzluğa görə cavabdehlik daşıyanlar isə direktor müavinləri Vəfa Əlinağıyeva və Namiq Ələkbərovdur. Bakı Şəhəri üzrə Təhsil İdarəsindən də bildirilib ki, qeyd olunan məsələ ilə bağlı müvafiq araşdırma aparılacaq, nəticəsi haqqında əlavə məlumat veriləcək.

“Araz”-ın əldə etdiyi məlumat görə, xəbər mətbuatda yayıldıqdan dərhal sonra, məktəbin direktoru Rəhilə Baxşiyevanın tapşırığına əsasən valideyn komitələri məktəbə çağrılıb. Onların hər birindən guya pul yığılmadığını təsdiq edən izahat alınıb və bu izahatlar əsasında akt tərtib olunub. Bu zaman məcburi imzalatdırma ilə üzləşənlər də olub.

Onu da qeyd edək ki, direktor həmçinin məktəbə yoxlama gələcəyi təqdirdə əsaslı məlumatları boş şaiyə kimi qələmə vermək və özünü əvvəlcədən sığortalamaq üçün metod tapıb — sosial şəbəklərdə valideyn komitələrinə “trol” fəaliyyəti həyata keçirmək tapşırığını verib. Onların çiyninə Rəhilə Baxşiyeva haqqında tərif xarakterli şərhlər yazılması ağır yük olaraq yüklənib. Həm də belə şərhlərdə guya direktorun pul yığımına qarşı olduğu bildirilir.

Lakin “görünən dağa bələdçi lazım olmadığı” üçün, illərdir davam edən bu xoşagəlməz əməllər aşkar olunaraq, təsdiqini tapıb və valideynlərin əksəriyyəti məktəbdə pul yığımını təsdiq edən şərhlərini paylaşıblar. Bu ciddi məsələ ilə bağlı direktor Rəhilə Baxşiyeva isə heç bir açıqlama verməyib.

Valideynlərin sosial şəbəkələrdəki həmin şərhlərini nöqtəsinə-vergülünə toxunmadan dəyərli oxucularımızın da diqqətinə çatdırırıq:

— Həmin fənn üzrə müəllim yanına hazırlığa getməsən 2 yazırlar şagirdlərə;

–Bir nəvəm baxçaya, bir nəvəm məktəbə gedir Baxçada 20 manat, məktəbdə 25 manat yığılır. Heç təəccüblənmədim…

— Məktəb direktoru Rəhilə elə kabinet düzəldib ki, ele bil baş nazirdir;

— 149 bazardır, nə məktəb, soyub soğana döndəriblər valideynləri. Burada yazanlar var ki, orada ele şey yoxdur, ya direktorun əlaltısı olan müəllimlərdir, ya da valideyn komitələri. Hamıya müəllimlər vatsapa yazır ki, pul yığılmır;

— Bu məktəb uzun illərdir belədir, sanki pul yığan müəllimlər direktornan əlbirdir. Məktəbdə yuxarı sinif şagirdləri, adları jurnalda gedən, özləri dərslərə gəlməyən uşaqlar buraxılış imtahanına gəlir;

— Vallah bezmişik, qızıl aldırırlar bizə. Attestat üçün 100 manat yığırdılar, vemədiyim üçün bütün qiymətləri uşağıma 3 yazdılar…

Belə şərhlərin sayı-hesabı yoxdur. Xatırladırıq ki, bir müddət öncə belə şərhlər əsasında veteninfo.az da maraqlı yazı dərc etmişdi. Məsələ ciddi olduğu üçün “Araz” Media Qrupu əməkdaşlarının diqqət mərkəzindədir. Yaxın günlərdə Qrupa daxil olan arazpress.com xəbər portalında geniş araşdırma yazısı dərc etməyi planlaşdırırıq.

Qarşı tərəfin mövqeyini də dərc etməyə hazırıq.

Tahir HÜSEYNOV,
Səməndər QURBANOV,

araz.az xəbər portalı.