Doğma Vətənimin, Böyük Xalqımın övladları gözəl insanlar, əziz dostlar!

Ən gözəl bayramımızın bu ən gözəl günündə ən gözəl arzu və istəklərimi sizlərə çatdırmağı Ulu Tanrı yenidən mənə nəsib etdi. Bu xoşbəxtliyə görə Böyük Allahıma minnətdaram və hər birimizə bəxş etdiyi böyük coşqulu ruh yüksəkliyi ilə pişvazına çıxdığımız və ana təbiətin oyanışı kimi simvolizə edilən Bahar Bayramının xoş gəlişiylə qarşınızda ola biləcək bütün təhlükə və xata-balalara son qoymaq ricamı öncədən Ona çatdırıram.

Bu Müqəddəs Bayramımızı Ulu Əcdadlarımızın yadigarı kimi Uca Yaradan bizə bəxş edib. Bütün dünya da bunu deyir ki, yüksək yeniləşdirici gücə malik bu bayramımız əsrlərdi ülvi bəşəri hisslərin daşıyıcısına çevrilib; Küsənlərin barışdırıcısı olaraq Ulularımızın zəngin daxili aləminin, müdrik həyat fəlsəfəsinin, rəngarəng qədim ənənələrinin qorunub saxlanılmasının, böyük xalqımızın öz tarixi-mədəni keçmişinə yüksək ehtiramının, bu ehtiramdan irəli gələn milli-mənəvi dəyərlərə dərin bağlılığın, milli ənənələri qoruyub saxlaya bilmək bacarığının,
o cümlədən kainat nizamına və ana təbiətə dərin sevginin parlaq ifadəsidir.

Bizlərə əmanət bu el bayramı qədimdən əsrlər yaddaşında dərin köklər salaraq, silinməz izlər qoyub. Uzaq dövrlərdən bəri bütün sınaqlardan çıxaraq, xalqımızın mənəvi dünyasının dərinliklərinə nüfuz edib və xoş gələcəklə bağlı işıqlı arzuların dolğun təcəssüm tapdığı dədə-baba torpaqlarımızda ənənəvi dəyərlərimizin təşəkkülündə mühüm rol oynayıb. Məhz buna görədir ki, ümumxalq bayramı kimi dünyanın dörd bir yanında məskunlaşan 50 milyondan çox soydaş doğmalarımız tərəfindən də, kainatın hər bir guşəsində qorunub saxlanılmaqla, uzun əsrlər sınağından üzüağ çıxa bilib.

Əziz həmvətənlər, canbir-qanbir soydaşlar!

Milli varlığımızın ayrılmaz parçası kimi yad təsirlərdən qoruduğumuz Müqəddəs Novruz Bayramı münasibətilə hər birinizə səmimi salamlarımı yetirir, böyüklü-kiçikli hər birinizə azərbaycançılıq məfkurəsi və milli dövlətçilik ideologiyası ətrafında daha sıx birlik arzulayır, evlərinizə od-ocaq hərarətli xoş bayram ovqatı, ailələrinizə ruzi-bərəkət dolu bol sevinc və firavanlıq diləyirəm! Qoy, bahar təravəti ölkəmizə, dövlətimizə, doğma Vətənimizə, başda ölkə rəhbəri və qürurumuz olan şəhid ailələri olmaqla, hər bir ailəyə xeyir-bərəkət və xoşbəxtlik gətirsin! Əsas istəyim budur ki, növbəti Novruz Bayramımızı illərdi həsrətində olduğumuz, qəlb göynədən, ürək ağrıdan Göyçədəki, Zəngəzurdakı… didərgin düşdüyümüz ata-baba yurdlarımızda qeyd edək!

Sizləri doğma-yaxınlarınızla bərabər bir daha səmimi qəlbdən təbrik edir, hər birinizə bu Gözəl Bayramın səmimiyyətindən irəli gələn və başda yer tutan xoş ovqatlı, bahar əhval-ruhiyyəli günlər, möhkəm cansağlığı, ailə səadəti, əmin-amanlıq kimi dərin ehtiram və səmimiyyət duyğulu arzu-istəklərimi çatdırıram! Gözəl Novruz bütün arzularınızı çin etməklə, şirin söz və ifadələri heç vaxt taleyinizdən əskik etməsin və öz xoş gəlişiylə qarşınızda ola biləcək bütün əzab-əziyyətlərə, çətinliklərə son qoysun! Tanrı sizləri pisliklərdən uzaq etməklə, boynunda haqqınız olan insanlara da möhtac qoymasın! Həmişə bayram ovqatlı olasınız!

“Araz” Media Qrupunun  kollektivi adından:

Dərin hörmət və səmimi duyğularla,
Hüseyn ƏZİZOĞLU,
media qurumunun təsisçisi və Baş redaktoru.

araz.az xəbər portalı.