Beynəlxalq Diaspor Mərkəzinin Gənclər Departamenti 31 Mart– Azərbaycanlıların Soyqırımı Günü ilə əlaqədar “Gənclər Tarixi Unutmur: 31 Mart Soyqırımı” adlı tədbir keçirib.

Bu barədə arazpress.com-a Beynəlxalq Diaspor Mərkəzinin Mətbuat Xidmətindən məlumat verilib. Məlumata görə Departament rəhbərliyi və əməkdaşlarının, alimlərin və ictimai xadimlərin iştirak etdiyi bu tədbirdə öncə 1918-ci ilin mart-aprel aylarında azərbaycanlılara qarşı törədilmiş soyqırımı qurbanlarının xatirəsi bir dəqiqəlik sükutla yad edilib.

Sonra təşkilatçılar tərəfindən xüsusi olaraq vurğulanıb ki, soyqırımı haqqında gənclərin daha çox məlumatlandırılması və tarixi həqiqətləri unutmamaları bu tədbirdə əsas olaraq götürülüb. Bu, Gənclər Departamentinin rəhbəri Ramal İsmayılovun tədbirə qatılan auditoriya qarşısındakı giriş nitqinin də əsas mövzusunu təşkil edib. O, öz çıxışında həmçinin 1918-ci ilin mart-aprel aylarında daşnak-bolşevik silahlı dəstələrinin Azərbaycan xalqına qarşı xüsusi qəddarlıqla törətdiyi soyqırımları öz amansızlığına və miqyasına görə təkcə Azərbaycan tarixində deyil, ümumilikdə bəşər tarixində ən qanlı cinayətlərdən biri olduğunu və soyqırımından 80 il sonra – 1998-ci il martın 26-da Ümummilli Lider Heydər Əliyevin imzaladığı “Azərbaycanlıların soyqırımı haqqında” Fərmanla həmin dəhşətli hadisələrə adekvat siyasi qiymət verildiyini və 31 mart tarixinin “Azərbaycanlıların Soyqırımı Günü” elan edildiyini qeyd edib.

Sonra digər tədbir iştirakçıları Ömər Abdullayev, Tarıyel İsmayılov, Kənan Alızadə, Mikayıl Namazov, Pərvin Qasımova, Fidan Rüstəmova soyqırımı tarixindən danışaraq, həmin faciədə soydaşlarımızın yaşadığı fəlakətlərdən bəhs edib, daşnak-bolşevik silahlı dəstələrinin hücumu zamanı törədilən amansız dağıntılar barədə maraqlı məlumatlar veriblər.

Daha sonra Ramal İsmayılov bir daha çıxış edərək, Beynəlxalq Diaspora Mərkəzinin Gənclər Departamentinin Facebook-da yeni səhifəsinin yaradılacağını və bu vasitə ilə ölkəmizdən kənarda yaşayan soydaşlarımızla yaxından əlaqə quracaqlarını bildirib. Qeyd edib ki, Mərkəzin bu addımı gənclərin diasporla əlaqələrini gücləndirəcək, həmçinin 31 Mart Soyqırımı kimi önəmli məsələlərin dünya miqyasında daha yaxşı tanıdılmasına töhfə verəcək.

Ramal İsmayılov onu da bildirib ki, Beynəlxalq Diaspor Mərkəzi tərəfindən martın 30-da 31 Mart – Azərbaycanlıların Soyqırımı Günü ilə əlaqədar olaraq, Quba Soyqırımı Memorial Kompleksini ziyarət edilməsi qərara alınıb.

Tədbirin sonunda iştirakçılar xatirə şəkli çəkdiriblər.

İqbal BƏHRAMOĞLU,

araz.az xəbər portalı.