Beynəlxalq Diaspor Mərkəzinin Mətbuat Xidmətindən “Araz”-a daxil olan məlumata görə, 31 Mart — Azərbaycanlıların Soyqırımı Günü ilə əlaqədar qurum media üçün açıqlama yayıb.

Həmin açıqlamada daşnak-bolşevik silahlı dəstələrinin Azərbaycan xalqına qarşı xüsusi qəddarlıqla törətdiyi soyqırımı hadisələri amansızlığına və miqyasına görə təkcə Azərbaycan tarixində deyil, ümumilikdə bəşər tarixində ən qanlı cinayətlər kimi qeyd edilib. Xüsusi olaraq vurğulanıb ki, məhz buna görə də, baş verən soyqırımı hadisələrindən 80 il sonra — 1998-ci ilin mart ayının 26-da Ulu Öndər Heydər Əliyevin imzaladığı “Azərbaycanlıların soyqırımı haqqında” Fərmanla həmin dəhşətli hadisələrə adekvat siyasi qiymət verilib və 31 mart tarixinin “Azərbaycanlıların Soyqırımı Günü” kimi elan edildiyi qeyd olunub.

“Beynəlxalq Diaspor Mərkəzi martın 30-da 31 Mart – Azərbaycanlıların Soyqırımı Günü ilə əlaqədar olaraq, Quba Soyqırımı Memorial Kompleksini ziyarət etməyi və abidə önündə anım tədbiri keçirməyi qərara alıb.

Bu ziyarət 1918-ci ildə xalqımıza qarşı törədilən qanlı soyqırımı hadisələrini bir daha anmaq, tarixi həqiqətləri xatırlatmaq və şəhidlərin əziz xatirəsini yad etmək məqsədi daşıyır. Çünki həmin ilin mart ayında baş verən bu faciələr Azərbaycan xalqına qarşı törədilmiş sistemli soyqırımı siyasətinin tərkib hissəsi kimi yaddaşlarda əbədiləşib. Bu hadisələr zamanı Bakıda, Şamaxıda, Qubada, Qarabağda, Zəngəzurda, Naxçıvanda və digər bölgələrdə minlərlə günahsız insan, o cümlədən qadınlar, uşaqlar və yaşlılar amansızcasına qətlə yetirilib, yaşayış məntəqələri yandırılıb, tarixi-mədəni irsimizin nümunələri olan abidələrimiz məhv edilib.

Onu da qeyd edək ki, xüsusilə Quba bölgəsində aşkarlanan kütləvi məzarlıqlar erməni vandalizminin miqyasını və vəhşiliyini açıq şəkildə sübut edir“, — açıqlamda deyilir.

Açıqlamanın sonunda o da qeyd olunur ki, Beynəlxalq Diaspor Mərkəzi bu tarixi faciənin unudulmaması, soyqırımı həqiqətlərinin beynəlxalq səviyyədə tanınması və gələcək nəsillərə çatdırılması istiqamətində fəaliyyətini bundan sonra daha geniş şəkildə davam etdirəcək. Bu məqsədlə, təşkilat tərəfindən hər il daha önəmli tədbirlər həyata keçiriləcək, beynəlxalq təşkilatlar və xarici ölkələrdəki diaspor nümayəndələri vasitəsilə Azərbaycan xalqının haqq səsi dünya ictimaiyyətinə çatdırılacaq.

İqbal BƏHRAMOĞLU,

araz.az xəbər portalı.