Xeyli müddətdir ki, Qarabağ uğrunda gedən döyüş əməliyyatlarının iştirakçısı olan vətəndaşlara “Müharibə veteranı” adının verilməməsi ilə bağlı mətbuatda dərc olunan yazılar, eləcə də əsaslı və əsassız iddialar səsləndirən şikayətçilərin sosial şəbəkə istifadəçiləri tərəfindən yayılan çıxışları ölkənin Müdafiə Nazirliyi barəsində ictimaiyyətdə xoşa gəlməyən rəy formalaşdırır.

“Araz” Media Qrupunun tərkibindəki xəbər portalları və qəzetlər media vasitələri olaraq, bu ciddi məsələyə məsuliyyətlə yanaşır. Lakin Ağsu rayonunun Ləngəbiz kənd sakini Şahin Şahı oğlu Novruzov tərəfindən arazpress.com-un ünvanına göndərilənlər həqiqət olduğu üçün, şikayətçiyə kömək məqsədilə bu yazını dərc etməyə qərar verdik.

Şahin Novruzovun dediklərinə görə, Müdafiə Nazirliyinin əlaqədar qurumları ona “Müharibə veteranı” adının verməməkdə israrlıdır — ortada şikayətçinin haqlı olduğunu təsdiq edən Şəki İnzibati Məhkəməsinin Qərarı olsa da (Qərarın və digər zəruri sənədlərin surətləri də yazıya əlavə olunur — red.). Başqa ümid yeri qalmadığı üçün, o, məcburiyyətdən ölkə başçısına və digər aidiyyatı qurumların səlahiyyət sahiblərinə müraciət edib.

Müraciəti olduğu kimi dərc edirik:

Azərbaycan Respublikasının Prezidenti möhtərəm İlham Əliyev cənablarına

Azərbaycan Respublikasının ədliyyə naziri cənab Fərid Əhmədova

Azərbaycan Respublikasının İnsan Hüquqları üzrə Müvəkkili
(Ombudsman), çox hörmətli Səbinə xanım Əliyevaya

Ağsu rayonu, Ləngəbiz kənd sakini
Novruzov Şahin Şahı oğlu tərəfindən

MÜRACİƏT

Möhtərəm Prezident!
Cənab nazir!
Çox hörmətli Səbinə xanım!

Məcburiyyətdən mətbuat vasitəsi ilə Sizə müraciət edərək bildirirəm ki, Birinci Qarabağ Müharibəsinin iştirakçısıyam. 1992-ci ilin sentyabr ayında Ağdərə rayonun Çıldıran kəndi uğrunda gedən döyüşlərdə yaralanmışam. Bir müddət hərbi hospitalda müalicə olunmuşam və sağaldıqdan sonra yenidən xidmət etdiyim hərbi hissəyə qayıtmışam. 1994-cü ilin yanvar ayının 21-də Murovdağ istiqamətində gedən döyüşlərdə ayaqlarımın don vurması nəticəsində 230 nömrəli hərbi hospitala göndərilmişəm. Hər iki ayaqlarımın I və II dərəcəli don vurması nəticəsində uzun müddət müxtəlif hərbi hospitallarda və xəstəxanalarda müalicələr almışam və bu xəstəliklə bağlı ikinci qrup müharibə əlili olmuşam.

Qarabağın azadlığı uğrunda gedən döyüşlərdə iştirak etməyimə baxmayaraq, “Müharibə veteranı” adını ala bilmədiyim üçün Azərbaycan Respublikasının Müdafiə Nazirliyinin Aparatı nəzdində fəaliyyət göstərən «Veteran adlarının və müvafiq vəsiqələrinin verilməsi üzrə Komissiya»ya müraciət etmişəm. Komissiya tərəfindən mənə 06.12.2023-cü il tarixli imtina məktubu verilib. Buna görə də, iddiaçı qismində cavabdeh Azərbaycan Respublikasının Müdafiə Nazirliyinə qarşı Şəki İnibati Məhkəməsinə iddia ərizəsi ilə müraciətim olub. Mənə “”Müharibə veteranı” adının və müvafiq vəsiqəsinin verilməsi öhdəliyinin cavabdehin üzərinə qoyulması» barədə qərar qəbul edilməsini məhkəmədən xahiş etmişəm.

Şəki İnzibati Məhkəməsinin (hakim Vüqar Musayev) 02 iyul, 2024-cü il tarixli 2-1(116)-1347/2024 nömrəli Qərarı ilə mənə “Müharibə veteranı” adı və vəsiqəsinin verilməsi öhdəliyi Azərbaycan Respublikasının Müdafiə Nazirliyinin üzərinə qoyulub. Cavabdehin apellyasiya və kassasiya şikayəti də məhkəmələr tərəfindən təmin edilməyib və Qərar qanuni qüvvəsini alıb və Müdafiə Nazirliyinə göndərilib. Qərarın icra edilməsi üçün 20 gün müddət müəyyən olunub.

Həmin müddət ərzində müvafiq tədbir görülməli və məhkəməyə məlumat verilməliydi. Qərar icra olunmadığı halda, Azərbaycan Respublikasının İnzibati Prosesual Məcəlləsinin müvafiq maddələrinin tələblərinə uyğun olaraq, cavabdeh tərəf 50.000 (əlli min) manat cərimə olunacaqdı.

Şəki İnzibati Məhkəməsi tərəfindən bu məktub Müdafiə Nazirliyinə 04 fevral, 2025-ci il tarixində göndərilib. Verilən müddətdən artıq iki ay vaxt keçib. Lakin dövlətin adından verilmiş Qərar qanunsuz olaraq icra edilmir. Bununla da, Müdafiə Nazirliyi tərəfindən Azərbaycan Respublikasının qanunları ilə qorunan hüquqlarım kobud şəkildə pozulur.

Ümumiyyətlə, məhkəmələrin qəbul etdiyi qərarlar dövlətin adından çıxarılır və onların icrası məcburidir. Bu, Azərbaycan Respublikasının Konstitusiyasında da qeyd edilib. Lakin Müdafiə Nazirliyi qərarın icrasını təmin etmək istəmir. Axı, bu necə ola bilər?

Möhtərəm Prezident!
Cənab nazir!
Çox hörmətli Ombudsman!

Xahiş edirəm, hüquqlarımın bərpa olunmasında mənə kömək edə və dövlətin adından çıxarılan Qərarın icra edilməsinə ciddi tapşırıqlarınızı verəsiniz!

Hörmətlə:
Novruzov Şahin Şahı oğlu.
Əlaqə telefonum: (050) 672 24 10 01 aprel, 2025-ci il.

Fərhad MƏMMƏDOV,

araz.az xəbər portalı.