Azərbaycan Respublikasının Türkiyə Respublikasındakı səfirliyi belə bir müraciət yaymışdı ki, Azərbaycanla Türkiyə arasındakı quru sərhədindən yalnız Naxçıvan Muxtar Respublikasının qeydiyyatında olanlar giriş-çıxış edə bilərlər. Ölkə əhalisindən bu müraciətə kəskin etiraz günü bu günədək davam edir.

Etirazçılar narahatlıqla belə deyirlər ki, ölkənin quru sərhədlərindən yalnız Naxçıvan qeydiyyatlı vətəndaşlara keçmə izini verilməsi Konstitusiyanın kobud surətdə pozulması, həm də ayrı-seçkilik deməkdir. Naxçıvan Azərbaycanın ayrılmaz tərkib hissəsidir və Konstitusiyadan üstün güzəşt və imtiyazlar ala bilməz. Quru sərhədlər açılacaqsa, hamı üçün açılmalıdır. Əgər bu Naxçıvan sakinlərinin sosial-iqtisadi vəziyyəti ilə əlaqələndirilirsə, ölkənin digər bölgələrində durum ordan daha acınacaqlıdır. Quru sərhədlər qapananadək Rusiya və İranla sərhəddə yerləşən ərazilərədə yaşayan soydaşlarımız məişət problemlərini müəyyən qədər həll edə bilir, kiçik ticarətlə dolana bilirdilər.

Artıq 4 ildən çoxdur ki, Azərbaycan höküməti həmin imkanlardan vətəndaşları məhrum edib. Pandemiya yoxdur, ancaq müxtəlif bəhanələrlə quru sərhədlərin bağlı saxlanılması yanlış qərardır və marginal maraqlara xidmət edir. Quru sərhədlər hamı üçün açılmalıdır ki, regional fəqrlilik də olmasın, bundan narazılıqlar da baş qaldırmasın.

Bu cür yanaşma bölgələri qarşı qarşıya qoyur və qıcıq yaradır. Mənim üçün bütün Azərbaycan doğmadır və hansısa regiona fərqli yanaşmıram da. Hesab edirəm ki, nə demək istədiyimi Naxçıvan qeydiyyatlı soydaşlarım, əslən bu bölgədən olan tələbə yoldaşlarım və dostlarım da yaxşı anladılar — quru sərhədlər mütləq və mütləq hamımız üçün açılmalıdır!

Məhi ELSEVƏR,                                                    “Araz” Media Qrupunun xüsusi müxbiri.

araz.az xəbər portalı.