Elçin ALIOĞLU,
Milli.Az xəbər portalının Baş redaktoru.          ————————————————————-

Cənubi Qafqaz bu gün heç vaxt olmadığı qədər sülhə yaxındır. Azərbaycan və Ermənistan — otuz ildən artıqdır yalnız silahların lüləsi arxasından bir-birinə baxan bu iki ölkə — artıq qarşıdurmanı bitirmək ərəfəsindədirlər.

Bəli, hələlik nə Zəngəzur dəhlizi açılıb, nə də rəsmi sülh sənədi imzalanıb. Lakin bütün bu məsələlər artıq qeyri-mümkün arzular kimi deyil, zaman məsələsi kimi görünür. Ermənistan baş naziri Nikol Paşinyanın Türkiyəyə tarixi səfəri və Azərbaycanın prezidenti İlham Əliyevlə görüşü göstərdi ki, onilliklər boyu müharibə ilə zəiflədilmiş bu iki xalq barış yolunu seçmək qərarına gəlib. Bu yolun qarşısını almaq istəyənlər çox olsa da, o, istər-istəməz hədəfə çatacaq.

Məhz bu prosesə kənardan narahatlıq və qısqanclıqla baxan üçüncü tərəf — Rusiyadır. Çünki Cənubi Qafqazda sülh Moskvanın maraqlarına ziddir. İmperiyalar qonşuların bir-birini didməsində maraqlıdır — çünki yalnız bu şəkildə öz təsirlərini qoruyub saxlaya bilirlər. Nə qədər çox xaos varsa, bir o qədər də nüfuz zonası geniş olur. Amma əgər Bakı ilə İrəvan ortaq dil tapa bilsə, əgər Ermənistan “türk təhlükəsi” mifindən qurtulub inkişaf fürsəti əldə etsə və qlobal logistika xəritəsində yer alsa — Moskvanın əlində təzyiq alətləri sadəcə tükənəcək.

Azərbaycan və Ermənistan artıq açıq şəkildə bildirirlər: keçmiş imperiya bizə koloniya kimi davranmaq gücündə deyil. Bakı da, İrəvan da hərəsi öz tərzində Moskvaya mesaj verir: “Biz heç kimin təsir zonası deyilik, biz müstəqil dövlətlərik”.

Amma eyni zamanda unutmamaq lazımdır ki, bu iki Cənubi Qafqaz respublikası necə bir güclə qarşı-qarşıyadır. Rusiya — aqressiv, güclü və təhlükəli dövlətdir. Hazırda Ukraynada bataqlığa düşüb, amma bir gün özünü bu vəziyyətdən çıxarmağa çalışacaq. Və həmin vaxt cavab addımları gələcək. Nə zaman və necə — bunu heç kim deyə bilməz.

Amma bir şeyə əmin olmaq olar: Kreml iqtisadi təzyiq rıçaqlarını işə salacaq, ticarəti hədəfə alacaq, pul köçürmələrini boğacaq, diasporlara qarşı basqılara başlayacaq. Artıq bu prosesin ilk əlamətləri görünür: erməni və azərbaycanlı məhsullarında “təsadüfi bakteriyalar”, Rusiyanın regionlarında azərbaycanlılara qarşı təqiblərin artması… Bu hələ sadəcə yoxlamadır, sınaq addımlarıdır. Amma yuxarıda kiminsə əmri gəlsə, cəzalandırıcı iqtisadi maşın tam gücü ilə hərəkətə keçəcək.

 

araz.az xəbər portalı.