“Araz” xəbər verir ki, rəsmi qaynaqlardakı xəbərə görə, Laçın rayonundakı Qayğı qəsəbəsində bir sıra işlərin reallaşdırılması məqsədi ilə tender keçirilib. Bir-neçə gün öncə isə, Laçın Rayon İcra Hakimiyyətinin keçirdiyi bu tenderin nəticələri açıqlanıb.

Tenderin qalibi “Avtoyoltikintiservis” MMC olub və İcra Hakimiyyəti qəsəbədə ümumi dəyəri 696 min 170 manat təşkil edən abadlıq, qəsəbə daxili yolların cari təmiri və qəsəbədaxili işıqlandırma işlərini həyata keçirmək üçün bu özəl müəssisə ilə müqavilə imzalayıb. Sözügedən MMC-nin qanuni təmsilçisi Ramin Adil oğlu Məmmədovdur.

Bura qədər hər şey qaydasındadır. Laçın Rayon İcra Hakimiyyəti tender keçirib, iştirakçı şirkətlərdən biri də prosesə qatılıb, sərfəli təklif verib və qalib elan olunub. Amma udan şirkətin kimə məxsus olması məsələnin əksini deməyə də əsas yaradır.

Ölkə mətbuatının əldə etdiyi bəzi  məlumatlara görə, Ramin Məmmədov Qobustanın icra başçısı Adil Məmmədovun oğludur və o, məhz atasının nüfuzu və vəzifəsindən istifadə edərək, əksər iri tenderlərin qalibi ola bilir. Güman ki, Raminin atasının icra başçısı olması səbəbindən, Laçının icra başçısı Aqil Nəzərli də ona bu tenderi “hədiyyə” edib.

Bununla bağlı araşdırmalarımızı davam etdiririk və dəyərli oxucularımızın diqqətinə çatdırırıq ki, yaxın günlərdə “Araz” qəzeti bu mövzu ilə bağlı geniş araşdırma yazısı təqdim edəcək. 

Yazıda adı keçən şəxslərin də mövqeyini dərc etməyə hazırıq.

Səməndər QURBANOV,

araz.az xəbər portalı.