16 mart — Strateji Obyektlərin Mühafizəsi Dövlət Agentliyi əməkdaşlarının peşə bayramı günüdür. Qurumun mətbuat xidmətindən “Araz” qəzetinə daxil olan məlumata görə, Strateji Obyektlərin Mühafizəsi Dövlət Agentliyinin əməkdaşlarının peşə bayramı ilə əlaqədar Agentliyin rəisi, general-mayor İlqar Abbasov şəxsi heyətlə birlikdə Fəxri Xiyabanda Ümummilli Lider Heydər Əliyevin məzarını ziyarət edib, dahi şəxsiyyətin əziz xatirəsini dərin ehtiramla yad edərək, məzarı önünə əklil və gül dəstələri qoyublar. Həmçinin, görkəmli oftalmoloq-alim, akademik Zərifə xanım Əliyevanın, tanınmış dövlət xadimi Əziz Əliyevin və professor Tamerlan Əliyevin də xatirələri yad edilib, məzarları üzərinə gül dəstələri düzülüb.

Məlumata görə, Şəhidlər Xiyabanında Vətənimizin müstəqilliyi və ərazi bütövlüyü uğrunda canlarını qurban vermiş şəhidlərimizin əziz xatirələri də yad edilib və məzarları üstünə güllər düzülüb. “Əbədi məşəl” abidəsinin önünə əklil qoyulub.

Strateji Obyektlərin Mühafizəsi Dövlət Agentliyi əməkdaşlarının peşə bayramı münasibətilə tədbir daha sonra Agentliyinin akt zalında davam etdirilib və maraqlı epizodik çalarları ilə yaddaqalan olub.

Məlumata əsasən onu da qeyd edək ki, Azərbaycan Respublikası Prezidentinin 15 mart 2025-ci il tarixli Sərəncamı ilə Agentliyin 12 nəfər hərbi qulluqçusu xidməti vəzifələrini yerinə yetirərkən fərqləndiklərinə görə dövlət təltifləri ilə mükafatlandırılıb. Agentlik rəisinin müvafiq əmrləri ilə, bir qrup hərbi qulluqçu müxtəlif medallarla və digər mükafatlarla təltif ediliblər.

Qurum rəhbərinin peşə bayramı ilə bağlı bildirdiyinə görə, beynəlxalq terrorizmin və sui-qəsdlərin geniş vüsət aldığı belə bir həssas dönəmdə mühafizə işinin təkmilləşdirilməsi və terrorçuluğa qarşı mübarizə, yüksək peşəkarlığa malik kadrların hazırlanması Agentliyin qarşısında duran əsas vəzifələrdəndir.  Situasiya  mərkəzinin yaradılması, pilotsuz uçuş aparatlarından və 14 km məsafəni müşahidə edən termal və optik spektr şəbəkə kamerası kimi texnikanın yeni nailiyyətlərindən istifadə olunması mühafizə fəaliyyətinin səmərəli şəkildə həyata keçirilməsi üçün yaradılmış təminatlardandır.

Peşə bayramı münasibətilə redaksiyamız adından, ölkəmizdə stabil mühitin qorunmasında böyük xidmətləri olan mühafizəçiləri biz də səmimi qəlbdən təbrik edir, işlərində uğurlar arzulayırıq.

 

Tahir HÜSEYNOV,

araz.az xəbər portalı.