Azərbaycan Respublikasının Diasporla İş üzrə Dövlət Komitəsində yüksək vəzifələrdə çalışmış və Mərkəzi Seçki Komissiyasının əvəzedici üzvü olmuş Surəddin Hümbətov uzun sürən xərçəng xəstəliyindən sonra 68 yaşında dünyasını dəyişib.

arazpress.com xəbər portalı bildirir ki, mərhumun əziz dostu və yaxını, tanınmış jurnalist Samir Feyruzov özünün Facebook səhifəsi vasitəsilə bu barədə məlumat verib. Bildirib ki, Surəddin Hümbətov Moskva Dövlət Universitetinin tarix fakültəsində ali təhsilə yiyələnib.

“Türklərin tarixi və Çanaqqala döyüşündə şəhid olan azərbaycanlılarla bağlı fundamental araşdırmaların müəllifidir. 2017-ci ildə Prezident İlham Əliyev tərəfindən “Tərəqqi” medalı ilə təltif olunan Surəddin Hümbətov bütün ömrünü Azərbaycan diaspor quruculuğuna həsr etmişdi. Ölkəmiz qarşısında əvəzsiz xidmətləri olan əsl ziyalı idi.

Bu gün günorta danışmışdım, çox yaxşı olduğunu dedi. Amma…

Allah sənə rəhmət eləsin, kövrək və mərd insan! Özün kimi sənin xatirələrin də gözəldir.

Səni tanıyanlar səndən həmişə razıdır, Allah da səndən razı olsun, yerini cənnət etsin…

Qeyd edim ki, S. Hümbətov sabah Fatmayi qəbirstanlığında dəfn olunacaq.

Yas mərasimi isə martın 18-də Heydər məscidində keçiriləcək” — Samir Feyruzov qeyd edib.

Jurnalistin bu paylaşımına Surəddin Hümbətovu yaxından tanıyanlar qısa müddət ərzində təəssüf dolu yüzlərlə status yazıblar. Böyük Allahdan ona rəhmət diləyərək, gözəl və xeyirxah bir insan, Vətən təəssübü çəkən əsl ziyalı kimi onu tanıdıqlarını xüsusi olaraq vurğulayıblar.

Xatırladırıq ki, 1957-ci ilin fevral ayının 2-də Qərbi Azərbaycanın Göyçə mahalında anadan olan Surəddin Məmmədhüseyn oğlu Hümbətov həm də 2021-ci ildə MSK-nın əvəzedeci üzvü seçilib. Onun namizədliyini hakim Yeni Azərbaycan Partiyası irəli sürüb.

Allah rəhmət eləsin! Qəbri nurla dolsun, ruhu şad, məkanı cənnət olsun!

araz.az xəbər portalı.