Beynəlxalq Diaspor Mərkəzinin sədri İsmayıl Ağayev bu günlərdə YouTube platformasında hüquqşünas Türkel Süleymanlının təqdimatında yayımlanan “Həyatın Axarı” verilişinin qonağı olub. “Araz” qəzeti bildirir ki, verilişin əsas mövzusu “Zəngəzur dəhlizi və Azərbaycan diasporu”  ilə bağlı olub və olduqca maraqlı alınıb. 

Verilişin aparıcısı Türkel Süleymanlı Azərbaycan-Ermənistan münasibətlərinə toxunaraq, geniş məlumat verdikdən sonra söhbəti Azərbaycan diasporunun fəaliyyəti mövzusuna yönəldib. O, İsmayıl Ağayevə beynəlxalq aləmdə fəaliyyət göstərən Azərbaycan diasporu, onun fəaliyyəti və qarşısında duran əsas vəzifələr barədə suallar ünvanlayıb.

İsmayıl Ağayev suallara cavabında xüsusi olaraq onu qeyd edib ki, Azərbaycan diasporunun dünyanın müxtəlif ölkələrində təşkilatlanması, onların milli maraqlarımız uğrunda birgə fəaliyyəti və Azərbaycanın haqq səsinin beynəlxalq ictimaiyyətə çatdırılması istiqamətində görülən işlər olduqca çətin olub. Lakin buna nail olmaq üçün bütün vasitələrdən istifadə edilib. Azərbaycan diasporu təkcə mədəniyyət və milli kimliyimizi qorumaqla kifayətlənməyib. Eyni zamanda, erməni təbliğatına qarşı mübarizə aparmaqda da önəmli rol oynayıb.

Daha sonra İsmayıl Ağayev şəxsi döyüş yolu haqqında danışaraq, 1992-ci ildən başlayaraq Goranboy rayonunun Gülüstan kəndinin müdafiəsi uğrunda “Didərginlər” batalyonunun tərkibində yaxın qohumları və silahdaşları ilə birlikdə erməni işğalçılarına qarşı apardıqları mübarizədən danışıb. O, həmin dövrdə Azərbaycan torpaqlarının müdafiəsi naminə canlarını fəda edən igid döyüşçülərin qəhrəmanlığını xüsusi vurğulayıb.

İsmayıl Ağayev Beynəlxalq Diaspor Mərkəzinin 2008-ci ildən bu günə qədər ölkəmizdə və onun hüdudlarından kənarda həyata keçirdiyi önəmli işlərdən də geniş söhbət açıb. Qeyd edib ki, qurum illərdir Azərbaycan həqiqətlərinin dünyaya çatdırılması, milli-mədəni irsimizin qorunması, erməni diasporunun yalan və iftiralarına qarşı effektiv mübarizə aparılması istiqamətində ardıcıl və prinsipial mövqe nümayiş etdirir.

Maraqlı alınan həmin verilişin tam versiyasını təqdim edirik:

araz.az xəbər portalı.