Xocalı soyqırımının 33-cü ildönümü ilə bağlı Strateji Obyektlərin Mühafizəsi Dövlət Agentliyində və onun regional idarələrində silsilə tədbirlər keçirilib. Bu barədə Agentliyin mətbuat xidmətindən “Araz“-a daxil olan xəbərdə bildirilir ki, tədbirlər zamanı Agentliyin əməkdaşları Xocalı soyqırımı qurbanlarının xatirəsinə ucaldılmış abidəni ziyarət edərək, önünə gül dəstələri düzüb, faciə qurbanlarının xatirəsini ehtiramla anıblar. Eyni zamanda, Xocalıdan olan ailələrlə görüşlər də keçirilib. 

Verilən xəbərə görə, bu tədbirdə çıxış edən Agentliyin rəisi, general-mayor İlqar Abbasov soyqırım tarixinin xalqımızın yaddaşında silinməz izlər buraxdığını və bu faciənin heç vaxt unudulmayacağını qeyd edərək, nitqinin sonunda aşağıdakı fikirlərini xüsusi olaraq vurğulayıb:

“44 günlük Vətən Müharibəsində müzəffər Ali Baş Komandanımızın rəhbərliyi altında qəhrəman Milli Ordumuzun göstərdiyi böyük igidlik və şücaət sayəsində Xocalı faciəsi qurbanlarının intiqamı alınıb. Beləcə, şəhidlərimizin qanı yerdə qalmayıb. 2023-cü ilin sentyabr ayında Azərbaycan ordusunun həyata keçirdiyi lokal antiterror əməliyyatları nəticəsində Xocalı şəhəri düşməndən tamamilə təmizlənib və bu müqəddəs torpağımızda Azərbaycan bayrağı dalğalanmağa başlayıb”. 

araz.az xəbər portalı.