“Reket jurnalist şəbəkəsi”nin əsas fiqurlarından biri hesab olunan “Gündəlik Bakı” qəzetinin həbsdə olan təsisçisi və baş redaktoru Habil Vəliyevin cinayət işi üzrə məhkəmənin yekun prosesi dünən keçirilib.

“Araz” qəzetinin əldə etdiyi xəbərə görə, Bakı Ağır Cinayətlər Məhkəməsində hakim Fəxri Məmmədovun sədrliyi ilə keçirilən prosesdə hökm oxunub. Hökmə əsasən, hüquq-mühafizə orqanlarına vətəndaşdan daxil olan müraciətlər əsasında saxlanılan Habil Vəliyev 8 il müddətinə azadlıqdan məhrum edilib.

Qeyd edək ki, Habil Vəliyev bir-neçə nəfəri şantaj etməkdə ittiham edilir. Ona qarşı Cinayət Məcəlləsinin 182.2.2-ci (hədə-qorxu ilə tələb etmə təkrar törədildikdə) və 182.2.4-cü (xeyli miqdarda əmlak əldə etmək məqsədi ilə törədildikdə) maddələri ilə ittiham irəli sürülüb.

Xatırladaq ki, daha əvvəl Dövlət Təhlükəsizlik Xidmətinin əməkdaşları tərəfindən saxlanılan Habil Vəliyev eyni ittihamla 4 il müddətinə azadlıqdan məhrum edilmişdi. Azadlığa çıxdıqdan az sonra eyni əməli törədərək “dəmir barmaqlıqlar” arxasına göndərilib.

araz.az xəbər portalı.