Bir-neçə gündür ki, Mərkəzi Gömrük Hospitalının və “Yeni Klinika”nın əməkdaşlarına maaşlarının ödənilməməsi ilə bağlı sosial şəbəkələrdə məlumatlar yayılıb. Bu barədə iddiaları əks etdirən şikayət xarakterli müraciətlər “Araz”-in redaksiyasına da daxil olub.

Şikayətçi həkimlər bildiriblər ki, Gömrük Hospitalında düz 2 ildir ki maaşlarının ödənilməsində ciddi problemlər yaranıb.  Həmçinin Yeni Klinikada da son aylar üçün əmək haqqı ödənilməyib.

Onu da qeyd edək ki, hər iki tibb müəssisəsinin şikayətçi əməkdaşları adlarının gizli saxlanılmasını da bizdən xahiş ediblər. Deyiblər ki, əks halda aqibətləri pis ola bilər.

Dəfələrlə etdiyimiz cəhdlərə baxmayaraq, məsələyə nə hospital, nə də ki, klinika rəhbərlərindən münasibət öyrənə bilmədik. Lakin dünən günorta saatlarında xəbər tutduq ki, Mərkəzi Gömrük Hospitalının və Yeni Klinikanın əməkdaşlarının maaşlarını ala bilməməsi ilə bağlı iddialara aydınlıq gətirilib. Hospitaldan APA-ya əməkdaşların əmək haqqı ödənişlərinin Azərbaycan Respublikasının qanunvericiliyinə uyğun olaraq həyata keçirildiyi bildirilib.

Mərkəzi Gömrük Hospitalının PR mütəxəssisi Dilarə Zamanova deyib ki, həkimlərin məzuniyyət haqları, maddi yardım və mükafatları tam həcmdə ödənilir: “Bütün həkimlər pullarını vaxtında alırlar”.

Eyni qaydada TƏBİB-dən qeyd olunub ki, Yeni Klinika ilə bağlı iddialar həqiqəti əks etdirmir: “Həkimlərin maaşları tam həcmdə ödənilib”.

Ta ki belə olsun. Bizsə edilən şikayəti diqqətdə saxlayacağıq. 

Məhi ELSEVƏR,

araz.az xəbər portalı.